نیشنل ڈیزاسٹر مینجمنٹ اتھارٹی (این ڈی ایم اے) نے 25 جون سے یکم جولائی 2025 کے دوران ملک بھر میں ممکنہ موسمی حالات کے پیش نظر ایڈوائزری جاری کر دی ہے۔

ایڈوائزری کے مطابق اس دوران ملک کے بیشتر علاقوں میں تیز ہواؤں، آندھی، گرج چمک اور موسلادھار بارشوں کا امکان ہے، جس کے باعث شہری اور دیہی علاقوں میں مختلف نوعیت کے خطرات پیدا ہو سکتے ہیں۔

ایڈوائزری میں خاص طور پر درج ذیل علاقوں کو حساس قرار دیا گیا ہے:

پنجاب:

لاہور، گوجرانوالہ، راولپنڈی، اسلام آباد، باغ، راولا کوٹ اور مظفرآباد میں موسلادھار بارشوں کے نتیجے میں شہری سیلاب کی صورتحال پیدا ہونے کا خدشہ ہے۔

سندھ:

سکھر، لاڑکانہ، حیدرآباد، کراچی، تھرپارکر، میرپور خاص، ٹھٹھہ اور بدین میں 25 تا 28 جون آندھی، طوفان اور گرج چمک کے ساتھ بارش کی پیشگوئی کی گئی ہے۔

خیبر پختونخوا:

چترال، دیر، سوات، مانسہرہ، پشاور، کوہاٹ، ایبٹ آباد، بنوں، کرم، مہمند اور دیگر اضلاع میں بھی 25 جون تا یکم جولائی آندھی اور بارش کی پیشگوئی ہے۔

گلگت بلتستان:

استور، سکردو، گلگت، ہنزہ، نگر، شگر، دیامیر، غذر اور گھانچے سمیت کئی علاقوں میں آندھی طوفان اور گرج چمک کے ساتھ بارش کا امکان ظاہر کیا گیا ہے۔

لینڈ سلائیڈنگ کا خطرہ:

کشمیر، خیبر پختونخوا اور گلگت بلتستان کے پہاڑی علاقوں میں بارشوں کے باعث لینڈ سلائیڈنگ کا خطرہ بھی موجود ہے۔

حفاظتی اقدامات کی ہدایات:

این ڈی ایم اے نے خبردار کیا ہے کہ تیز ہواؤں اور آندھی کے دوران کمزور درختوں، کچی دیواروں اور ناقص تعمیرات کو نقصان پہنچ سکتا ہے۔ شہریوں کو ہدایت کی گئی ہے کہ:

آندھی اور طوفان کے دوران بجلی کے کھمبوں، بل بورڈز اور کمزور ڈھانچوں سے دور رہیں۔

گاڑیوں کو کھلی جگہ کے بجائے محفوظ مقامات پر پارک کریں۔

حدِ نگاہ کم ہونے کی صورت میں سفر سے گریز کریں یا محتاط ڈرائیونگ کریں۔

اداروں کو الرٹ جاری:

این ڈی ایم اے نے تمام متعلقہ وفاقی و صوبائی اداروں کو ہدایت جاری کی ہے کہ وہ کسی بھی ممکنہ ہنگامی صورتحال سے نمٹنے کے لیے پیشگی اقدامات کو یقینی بنائیں۔

عوام کے لیے ہدایت:

عوام سے گزارش کی گئی ہے کہ موسمی حالات سے باخبر رہنے اور ممکنہ خطرات سے بروقت آگاہی کے لیے “پاک این ڈی ایم اے ڈیزاسٹر الرٹ ایپ” کا استعمال کریں۔