کراچی : پاکستان کرکٹ ٹیم کے سابق فاسٹ بالر محمد آصف نے ٹورنامنٹ میں بھارت کے  کامیاب ترین بیٹر ابھیشک کو آؤٹ کرنے کا گر بتاتے ہوئے شاہین آفریدی کو اہم مشورہ دے ڈالا ہے۔

پاکستان کے سابق فاسٹ بولر محمد آصف نے بھارتی اوپنر ابھیشیک شرما کی بیٹنگ حکمتِ عملی پر بات کرتے ہوئے کہا ہے کہ اگر بولر اچھی لینتھ پر لگاتار تین گیندیں ڈالے تو وہ گارنٹی کے ساتھ آؤٹ ہو جائیں گے۔

مزید پڑھیں: پاک-بھارت ایشیا کپ فائنل: ٹکٹوں کی مانگ میں ریکارڈ اضافہ

ایک انٹرویو میں محمد آصف نے کہا کہ ایک ہی جگہ پر مسلسل گیندیں کرنا ضروری ہے، چاہے بیٹر باؤنڈری بھی مار لے لیکن بولر کو اپنا پلان تبدیل نہیں کرنا چاہیے۔ انہوں نے مثال دیتے ہوئے کہا کہ”کون پہلا گیند باؤنسر کرواتا ہے، لیکن شاہین آفریدی نے ابھیشیک کے خلاف پہلی ہی گیند باؤنسر کرا دی تھی۔

واضح رہے کہ ایشیا کپ 2025 میں بھارتی بیٹر ابھیشیک شرما شاندار فارم میں ہیں۔ سری لنکا کے خلاف گزشتہ میچ میں انہوں نے صرف 31 گیندوں پر 61 رنز کی برق رفتار اننگز کھیلی۔

ابھیشیک شرما ٹی20 ایشیا کپ کے ایک ایڈیشن میں 300 سے زائد رنز بنانے والے پہلے بلے باز بن گئے ہیں۔ وہ اب تک 6 میچز میں 309 رنز بنا چکے ہیں۔ اس سے قبل یہ ریکارڈ پاکستانی وکٹ کیپر بیٹر محمد رضوان کے پاس تھا، جنہوں نے ایک ایڈیشن میں سب سے زیادہ رنز بنائے تھے۔