قومی کرکٹ ٹیم کے اسٹار بیٹر بابر اعظم نے طویل انتظار کے بعد بالآخر سنچری بنا کر اپنی فارم کی بحالی کا بھرپور اعلان کردیا۔
807 دن اور 83 اننگز کے بعد آنے والی اس سنچری نے نہ صرف شائقین کا انتظار ختم کیا بلکہ ٹیم کے لیے بھی نئی امیدیں پیدا کیں۔
سری لنکا کے خلاف دوسرے ون ڈے میں بابر اعظم نے کلاسیک اسٹروکس سے بھرپور 102 رنز اسکور کیے۔
میچ کے بعد بابر اعظم نے اپنے انسٹاگرام پر چند تصاویر پوسٹ کرتے ہوئے کیپشن میں صرف ایک لفظ لکھا کہ “الحمدللّٰہ” اور ساتھ ہی انہوں نے طویل عرصے تک ان کا ساتھ دینے پر مداحوں کا شکریہ بھی ادا کیا۔
View this post on Instagram
بابر اعظم کی پوسٹ پر مداحوں کی جانب سے مبارکبادوں اور نیک تمناؤں کا اظہار کیا گیا جبکہ کرکٹ حلقوں میں بھی ان کی واپسی کو بھرپور سراہا گیا۔
واضح رہے کہ اس اہم اننگز کی بدولت پاکستان نے سری لنکا کو دوسرے ون ڈے میں 8 وکٹوں سے شکست دی۔ 289 رنز کا ہدف قومی ٹیم نے صرف دس گیندیں قبل حاصل کیا جبکہ فیصلہ کن اسٹروک بھی بابراعظم ہی نے کھیلا۔
بابر اعظم نے 8 خوبصورت چوکوں کی مدد سے اپنی سنچری مکمل کی، اس تاریخی لمحے کے بعد انہوں نے پہلے آسمان کی طرف دیکھ کر اظہارِ تشکر کیا اور پھر سجدۂ شکر ادا کیا، تاہم جب وہ سنچری کے سنگِ میل پر پہنچے تو پورا اسٹیڈیم کھڑے ہو کر ان کو خراجِ تحسین پیش کرتا رہا۔
میچ کے بعد گفتگو میں بابر اعظم نے کہا کہ مداحوں کی مسلسل حمایت نے انہیں حوصلہ دیا۔ ہدف کے مطابق بیٹنگ کی اور سنچری بنانے سے اعتماد میں خاطر خواہ اضافہ ہوا ہے۔
