پاکستانی  اداکارہ میرا جی  عام طورپر سوشل میڈیا اور خبروں کی شہ سرخیوں میں نظر آتی ہیں تاہم حالیہ دنوں میں اداکارہ کی جانب سے ایک کے بعد ایک نئی ویڈیو انٹرنیٹ کی زینت بن رہی ہے اور خوب وائرل ہورہی ہے۔

میرا جی کی جانب سے ایک نیا ویڈیو پیغام جاری کیا گیا ہے جس میں انہوں نے اپنی گزشتہ ویڈیو پر وضاحت بھی دی ہے۔

اپنے نئے ویڈیو پیغام میں اداکارہ میرا جی نے کہا ہے کہ میں نے اپنے گزشتہ ویڈیو پیغام میں جو وزیر اعظم پاکستان عمران خان سے وطن واپس لانے کی اپیل کی تھی، پاکستانی ہونے کے ناطے یہ میرا بنیادی حق ہے۔

ایک منٹ کے دورانیےکی ویڈیو پر مشتمل نئے پیغام میں میرا نے کہا ہے کہ کچھ لوگوں نے میری گزشتہ ویڈیو کو ایسے برے وقت میں نیا رنگ دینے کی کوشش کی اور مذاق بنایا جو کہ انتہائی غیرمناسب ہے ۔

میرا نےکہاکہ نیو یارک میں پاکستانی سفارتخانہ میرے حالات سے آگاہ ہے، اور ان کے تعاون پر میں قونصل جرنل عائشہ علی کی مشکور ہوں ،گزشتہ روز بھی نیو یارک میں کورونا وائرس نے 500 افراد کو نگل لیا جس سے میں شدید خوفزدہ ہوں۔

میرا نے عوام سے اپیل کرتے ہوئے کہا ہے کہ خدایا یہ وقت کسی کا مذاق اڑانے یا جذبات سے کھیلنے کا نہیں ہے، دعا کریں میں بھی بہت جلد پاکستان پہنچ کر کورونا وائرس سے متاثرین  کے لیے امدادی کاموں میں بڑھ چڑھ کر حصہ لوں ۔

خیال رہے کہ گزشتہ دنوں نیویارک میں اداکارہ میرا نے اپنے ایک ویڈیو پیغام میں ہاتھ جوڑ کر وزیراعظم عمران خان سے مدد کی اپیل کی تھی۔

انہوں نے کہا تھا کہ میں بیرون ملک میں اس طرح کے حالات میں نہیں بلکہ پاکستان آکر اپنے ملک میں مرنا چاہتی ہوں۔