دنیا بھر کے فنکاروں، ڈیزائنرز اور معماروں نے جب اپنی روشنی کی جادوگری مشہور نہروں کے کنارے بکھیری تو عام سی رات ایک خواب ناک کہانی میں بدل گئی۔
ایمسٹرڈیم لائٹ فیسٹیول میں اس بار نہ صرف 20 نئی انسٹالیشنز پیش کی گئیں بلکہ کچھ فن پارے اتنے عجیب تھے کہ دیکھنے والے لمحوں کے لیے گنگ رہ گئے۔
شہر کی نہروں کے اطراف ایسے مجسمے نصب کیے گئے ہیں جنہیں روشنی ملتے ہی یہ یوں لگتا ہے جیسے وہ سانس لے رہے ہوں۔
کچھ مقامات پر انسان نما روشن ڈھانچے زائرین کے گزرتے ہی اپنا رنگ بدل دیتے ہیں اور ایسا محسوس ہوتا ہے جیسے وہ آنے جانے والوں سے خاموش گفتگو کر رہے ہوں۔
ایک فن کار نے ہوا میں تیرتی ہوئی روشن پرچھائیاں تخلیق کی ہیں جو ہوا کے ساتھ شکل بدلتی ہیں۔ کشتیوں میں بیٹھے سیاح ان اڑتی روشنیوں کو دیکھ کر حیران رہ جاتے ہیں کہ آیا یہ حقیقت ہے یا کوئی خواب۔
دنیا بھر سے لاکھوں افراد اس منفرد میلے میں شریک ہو رہے ہیں جو یورپ کے سب سے بڑے لائٹ فیسٹیولز میں سے ایک بن چکا ہے۔
تاریخی نہریں، جو یونیسکو ورلڈ ہیریٹیج میں شامل ہیں اس فیسٹیول کے دوران کسی سائنسی فکشن فلم کا منظر پیش کرتی نظر آتی ہیں۔
روشنی کے عجائبات پر مشتمل یہ میلہ 18 جنوری تک جاری رہے گا جہاں ہر رات روشنی کی زبان میں ایمسٹرڈیم ایک نئی کہانی سناتا ہے۔
