وزیراعظم عمران خان نے ٹائیگرز فورس کو ملک گیر سطح پر آپریشنل کرنے کی منظوری دے دی ہے۔

تفصیلات کے مطابق وزیراعظم عمران خان سے معاونین خصوصی ثانیہ نشتر اور عثمان ڈار کی ملاقات ہوئی جس میں ٹائیگر ریلیف فورس اور احساس ریلیف فنڈ پر بات چیت کی گئی۔

اس موقع پرعثمان ڈار نے ٹائیگر فورس کی رجسٹریشن اور ذمہ داریوں اور سیالکوٹ میں ٹائیگر فورس کے کامیاب ٹیسٹ رن اور آپریشنل تیاریوں پر بریفنگ دی ۔

ملاقات میں وزیراعظم عمران خان نے ہدایت دی  کہ ٹائیگر فورس کو سوموار سے پورے ملک میں متحرک کر دیا جائے۔

 وزیراعظم نے رضا کار فورس سے خود خطاب کرنے کا فیصلہ کرتے ہوئے کہا کہ ٹائیگر فورس کو سوموار سے پورے ملک میں متحرک کر دیا جائے اور میں خود سوشل میڈیا پلیٹ فارمز پر رجسٹرڈ نوجوانوں سے خطاب کروں گا۔

وزیراعظم عمران خان کی ہدایات کے بعد عثمان ڈار متحرک ہوگئے اور بڑے پیمانے پر تیاریاں شروع کردیں،اس حوالے سے انہوں نے چیف سیکرٹری پنجاب اور کمشنرز کے ساتھ ویڈیو لنک اجلاس کیا۔

عثمان ڈار کے مطابق ٹائیگر فورس بے روزگار مزدوروں کی نشاندہی بھی کرے گی، احساس پروگرام کے ذریعے بے روزگار مزدوروں کی مالی مدد کی جائے گی۔

عثمان ڈار کا مزید کہنا ہے کہ ٹائیگر فورس ریلیف سرگرمیوں کے ساتھ ساتھ عوامی آگاہی کی زمہ داریاں بھی انجام دے گی، ٹائیگرز فورس سے مساجد، یوٹیلیٹی اسٹورز ،قورنطینہ سنٹز سمیت اہم مقامات پر خدمات لی جائیں گی۔