پاکستان کرکٹ بورڈ(پی سی بی) کرکٹرز کے سنٹرل کنٹریکٹ کا اعلان آج کرے گا۔

پی سی بی کے چیف ایگزیکٹو وسیم خان کا کہنا ہے کہ کھلاڑیوں کو سیکیورٹی دینے کے لیے کنٹریکٹ کا اعلان جلد کیا جارہا ہے۔اس سلسلے میں چیف سلیکٹر مصباح الحق منگل کوفہرست جمع کرائیں گے، جس کے بعد چیئرمین پی سی بی کی منظوری درکار ہوگی۔

چیف ایگزیکٹو پی سی بی نے کہاکہ سنٹرل کنٹریکٹ کیلئے میچز کےتینوں فارمیٹ کھیلنے والے کو پہلی ترجیح دی جائے گی، پی سی بھی اس بار کھلاڑیوں کی تنخواہوں میں  اضافہ کرنے کے بارے میں بھی سوچ رہا ہے۔

انہوں نے کہا کہ سنٹرل کنٹریکٹ میں اے بی اور سی تینوں کیٹگریز ہوں گی جس میں کوشش کی جائے گی کہ اس میں 19 سے 20 پلئیرز کو شامل کریں تاہم  قومی کھلاڑیوں کی کیٹگریز سے متعلق کوئی فیصلہ تاحال نہیں ہوا ۔

وسیم خان نے دورہ انگلینڈ سے متعلق بات کرتے ہوئے کہا کہ دورے کے لیے کھلاڑیوں اور آفیشلز کی صحت اور حفاظت اولین ترجیح ہے، صحت اور حفاظت پر سمجھوتہ نہ کرکے ہی سیریز پربات ہوگی۔

ان کا کہنا تھا کہ اس وقت  انگلینڈ کےحالات ٹھیک نہیں، 15 مئی کو ای سی بی سے تفصیلی بات چیت ہوگی، ٹیلی کانفرنس میں دورہ انگلینڈ سے متعلق کوئی فیصلہ نہیں ہوگا ۔

انہوں نے کہا کہ اگلے تین چار ہفتے صورتحال کا جائزہ لیا جائے گا، سیریز میں ٹیسٹ میچز کوبڑھانےسے متعلق ابھی تبادلہ خیال ہونا ہے، جبکہ انگلینڈ کے جوابی دورے سے متعلق یہ مناسب وقت نہیں ہے۔

وسیم خان کا مزید کہناتھا کہ پی سی بی کی اگلے مالی سال کے لیے پوزیشن مستحکم ہے، اس کے بعد کرکٹ نہ ہوئی تو مسائل ہوں گے۔

چیف ایگزیکٹو نے کہا کہ بدھ کو کرکٹ کمیٹی کا اجلاس ہوگا جس میں ڈیپارٹمنٹل کرکٹ کی بحالی پر تبادلہ خیال کیا جائے گا ۔

انہوں نے کہا کہ سابق کھلاڑیوں کا موجودہ کھلاڑیوں کو آن لائن لیکچرز کا تجربہ زبردست رہا جو کہ جاری رکھیں گے، اس کے علاوہ ڈومیسٹک کرکٹ سیزن کے لیے حکمت عملی بنانے کا آغاز کیا گیاہے۔

وسیم خان  نے بتایا کہ ہم نے ڈومیسٹک کرکٹ کے لیے بجٹ بنا لیا ہے اب اسپانسرز درکار ہیں،مزید ایک سال کے لیے ہم ڈومیسٹک کرکٹ پر خرچ کر سکتے ہیں، آئندہ سیزن کیلئے مشکل ہوگی ۔

انہوں نے کہا کہ عالمی وبا  کے باعث اسپانسرز کے حصول میں مشکلات ہیں، کوویڈ۔19 کی وجہ سے سیزن کے التواء کے حوالے سےپلان بنا رہے ہیں۔