وزیراعلی پنجاب سردار عثمان بزدار کی جانب سے ایل ڈی اے انصاف ویب پورٹل اور موبائل پورٹل لانچ کر دیا گیا ہے۔

تفصیلات کے مطابق وزیراعلی پنجاب سردار عثمان بزدار کی جانب سے پنجاب کے لئے ایل ڈی اے انصاف ویب پورٹل اور موبائل پورٹل لانچ کر دیا گیا ہے۔

اس موقع پر ڈویلپمنٹ اتھارٹی کے افسران و ملازمین کی جانب سے چیف منسٹر فنڈ برائے کورونا کنٹرول میں 27 لاکھ 78 ہزار روپے کا چیک وزیراعلی عثمان بزدار کو پیش کیا گیا جبکہ ڈویلپمنٹ اتھارٹی کے ڈائریکٹر جنرل احمد عزیز تارڑ کی جانب سے وزیراعلی پنجاب کو چیک دیا گیا ہے۔

پورٹل کی لانچنگ کے وقت وزیراعلیٰ عثمان بزدار نے کہا ہے کہ شہریوں کوانصاف ویب پورٹل اور موبائل پورٹل کے ذریعے آن لائن درخواستیں دینے کی سہولت فراہم کر دی گئی ہے جبکہ ڈویلپمنٹ اتھارٹی کی طرف سے انصاف پورٹل کا قیام شہریوں کے افسران سے فوری رابطے اور شکایات کے بلا رکاوٹ اندراج کے لئے اہم ترین اقدام ہے۔

انہوں نے کہا کہ جدید ٹیکنالوجی کے استعمال سے شہریوں کی درخواستو ں پر کم سے کم وقت میں عملدرآمد ممکن ہو سکے گا اور ایل ڈی اے فعال طور پر شہریوں کی خدمت کر سکے گا۔

وزیر اعظم کا شاہین رضا کے انتقال پر گہرے افسوس کا اظہار

اس موقع پر عثمان بزدار کا کہنا تھا کہ پورٹل کے ذریعے ایل ڈی اے آفس آنے کے لئے آن لائن اپوائنمنٹ حاصل کی جاسکے گی اور پورٹل کے ذریعے پہلے مرحلے میں مختلف قسم کی درخواستیں آن لائن جمع کروائی جا سکیں گی۔

ان کا کہنا تھا کہ اس پورٹل کی مدد سے عدالتی احکامات آن لائن جمع کروائے جاسکیں گے اور مختلف قسم کے سوالات آن لائن کئے جا سکیں گے اور رجسٹرڈ آر کیٹیکٹس کے ذریعے ایل ڈی اے کی اپنی اور منظور شدہ پرائیویٹ رہائشی سکیموں میں عمارتوں کی تعمیر کے لئے نقشے منظور کرانے کی درخواستیں آن لائن جمع کروائی جا سکیں گی۔

تقریب میں ڈی جی ایل ڈی اے نے انصاف پورٹل کے بارے میں بریفنگ بھی دی۔

صوبائی وزیر ہاؤسنگ میاں محمود الرشید،چیف سیکرٹری، وائس چیئرمین ایس ایم عمران، سیکرٹری ہاوسنگ،پرنسپل سیکرٹری وزیراعلی ،ڈائریکٹر جنرل احمد عزیز تارڑ، سیکرٹری اطلاعات، سپیشل مانیٹرنگ یونٹ کے سربراہ اور متعلقہ حکام نے تقریب میں شرکت کی۔