پیپلز پارٹی کی مرکزی ڈپٹی سیکریٹری اطلاعات پلوشہ خان نے  کہا ہے کہ چینی اسکینڈل کا بنیادی کردار عمران خان ہیں۔

تفصیلات کے مطابق پیپلز پارٹی کی مرکزی ڈپٹی سیکریٹری اطلاعات پلوشہ خان نے حکومت پر تنقید کرتے ہوئے کہا کہ عمران خان کا مافیاٸی کردار بے نقاب ہو چکا ہے۔

پیپلز پارٹی کی مرکزی ڈپٹی سیکریٹری اطلاعات نے کہا کہ وزیراعظم کا ترین سے اور خسرو بختیار کا بھاٸی سے تعلق نہیں شرمناک تاویل ہے۔

پلوشہ خان نے یہ بھی کہا کہ شہزاد اکبر عثمان بزدار کا نام لیتے تو بنی گالا میں مرغا بنایا جاتا ، ادویات کی قیمتوں میں لوٹ مار بنی گالا کا پتہ دیتی ہے۔

پیپلز پارٹی کی مرکزی ڈپٹی سیکریٹری اطلاعات پلوشہ خان نے مزید کہا کہ عمران خان کو اقتدار میں لانے میں سلیکٹروں کے ساتھ جہانگیر تریں کا سرمایہ بھی شامل ہے۔

شوگر انکوائری رپورٹ پبلک کر دی گئی

یاد رہے اس سے قبل وزیر اعظم عمران خان کی زیر صدارت وفاقی کابینہ اجلاس ہوا جس میں شوگرانکوائری کمیشن کے سربراہ اور ڈی جی ایف آئی اے واجد ضیاء نے کمیشن کی رپورٹ وزیراعظم کو پیش کردی۔

اجلاس میں شوگر انکوائری کمیشن کی رپورٹ پبلک کرنے کا فیصلہ کیا گیا جبکہ کورونا وائرس کی صورتحال، ملکی اندرونی سیکیورٹی،سلامتی سے متعلق امور کا جائزہ لیا گیا

ذرائع نےبتایا تھا کہ 346 صفحات پر مبنی شوگر کمیشن کی حتمی رپورٹ میں شوگر ملز مالکان پر ٹیکس چوری کا الزام عائد کیا گیا ہے اور 200 سے زائد صفحات کی رپورٹ کے ساتھ شوگر ملز مالکان کے بیانات بھی لگائےگئے ہیں۔

خیال رہے کہ گزشتہ دنوں چینی بحران پر وفاقی تحقیقاتی ایجنسی (ایف آئی اے) کی تحقیقاتی رپورٹ میں انکشاف کیا گیا تھاکہ ملک میں چینی بحران کا سب سے زیادہ فائدہ حکمران جماعت کے اہم رہنما جہانگیر ترین نے اٹھایا، دوسرے نمبر پر وفاقی وزیر خسرو بختیار کے بھائی اور تیسرے نمبر پر حکمران اتحاد میں شامل مونس الٰہی کی کمپنیوں نے فائدہ اٹھایا۔