احتساب عدالت نے توشہ خانہ ریفرنس میں سابق وزیراعظم نواز شریف کے قابل ضمانت وارنٹ گرفتاری جاری کر دیئے جبکہ آصف زرداری کو آج حاضری سے استثنیٰ مل گیا۔ 

تفصیلات کے مطابق احتساب عدالت میں جعلی اکاؤنٹس کیس میں توشہ خانہ ریفرنس کی سماعت ہوئی۔

عدالت نے سابق صدر آصف زرداری کو 11 جون کو طلب کرلیا۔

جج احتساب عدالت نے کہا آصف زرداری کو صرف آج کی حاضری سے استثنیٰ دے رہا ہوں، آئندہ سماعت پر آصف زرداری ہر صورت پیش ہوں۔

قومی احتساب بیورو نے یوسف رضا گیلانی اور عبدالغنی مجید کو گرفتار کرنے کی استدعا کرتے ہوئے کہا کہ نواز شریف، آصف زرداری کو ان کی رہائشگاہوں پر سمن وصول کرائے، انور مجید ہسپتال میں زیر علاج ہیں، وہاں سمن وصول نہیں کیے گئے۔

واضح رہے کہ یوسف رضا گیلانی نے میڈیا سے بات کر تے ہو ئے اس سلسلے میں کہا ہے کہ میرا منی لانڈرنگ کیس سے کوئی تعلق نہیں ،توشہ خانہ کی گاڑیاں نواز شریف اور آصف زرداری کو قوائد و ضوابط کے مطابق دی ۔

 یوسف رضا گیلانی نے کہا کہ سیکرٹری کیبنٹ کی سفارش پر گاڑیاں دی گئی ،قانون کے مطابق سمری آنے پر توشہ خانہ سے گاڑیاں دی ،میں نیب زادہ نہیں ہوں بلکہ نیب زدہ ہوں ۔

انھوں نے مزید کہا کہ دس سال جیل کاٹنے کے بعد باعزت بری ہوا ،عمران خان کسی ایک صوبے کے نہیں بلکہ پورے ملک کے وزیراعظم ہیں۔