سندھ اسمبلی میں کورونا وائرس کے پیش نظر احتیاطی تدابیر کو مدنظر رکھتے ہوئے اجلاس کے قواعد و ضوابط تبدیل کردیے گئے۔

تفصیلات کے مطابق سندھ اسمبلی میں اجلاس کیلئے پہلی بار جدید ٹیکنالوجی کا استعمال کیا جائے گا جس کیلئے اسمبلی کے قواعد و ضوابط میں اتفاق رائے سے ترمیم کردی گئی۔

ترمیم کے تحت ارکان اسمبلی  اپنے گھر اور آفس سے بیٹھ کر اسمبلی کےاجلاس میں شرکت کر سکیں گے۔

اس حوالے سے وزیر اعلیٰ سید مراد علی شاہ کا کہنا ہے کہ چاہتے ہیں وہ ممبرز جن کی رپورٹ مثبت ہے وہ بھی بجٹ سیشن میں حصہ لیں اور وہ ممبرز بھی جن کی عمر زیادہ ہےانہیں اسمبلی نہیں آنا پڑے۔

وزیراعلیٰ کا کہناتھا کہ سافٹ وئیر کی مدد سے گھر سے بیٹھ کر تقریر بھی کی جا سکتی ہے، اس حوالے سے ارکان اسمبلی کوای میل پر لاگ ان آئی ڈی آجائے گی، اگرکسی نے اپنی آئی ڈی کسی دوسرے کو دی تو وہ اس کا خود ذمہ دارہوگا۔

وزیراعلیٰ نے کہا کہ ارکان اسمبلی کو ہدایات جاری کی گئی تھیں کہ وہ ٹیسٹ کروا کر اسمبلی آئیں، 17 تاریخ کو بجٹ پیش کریں گے، میں نے 12 جون کو ٹیسٹ کروایا میری رپورٹ منفی ہے، ہو سکتا ہے آدھے گھنٹے بعد مثبت ہو جائے۔

اُنہوں نے کہا کہ اب تک 90 اراکین کے ٹیسٹ ہوئے ہیں جن میں سے 83 منفی آئے۔

انہوں نے بتایا کہ عارف مصطفیٰ جتوئی کا کل کورونا ٹیسٹ پازیٹو آیا تھا، کل ہی اُن کا پھر ٹیسٹ کرایا تو وہ نیگیٹو آیا، عارف مصطفیٰ کا ایک ٹیسٹ اور کرائیں گے۔

انہوں نے مزید کہا کہ بجٹ کے بعد وزیرصحت کورونا پر پھر بریفنگ دیں گی۔