پی آئی اے کے طیارے کو پیش آنے والے حادثے کی ابتدائی تحقیقاتی رپورٹ آج پیش کی جائے گی۔

تفصیلات کے مطابق وفاقی وزیر برائے ہوا بازی غلام سرور طیارہ حادثے کی ابتدائی تحقیقاتی رپورٹ پیش کریں گے۔

وزیراعظم  نے گزشتہ دنوں ہونے والے اجلاس میں وفاقی وزیر غلام سرور سے تحقیقاتی رپورٹ کے بارے میں استفسار کیا تھا۔

ذرائع کا کہناتھا کہ وفاقی وزیر غلام سرور نے وزیراعظم کو یقین دہانی کرائی تھی کہ وہ پیر کو ابتدائی تحقیقاتی رپورٹ پیش کردیں گے۔

خیال رہے کہ عید الفطر کی مناسبت سے خصوصی طور پر چلائی جانے والی پی آئی اے کی پرواز نے لاہور سے دوپہر ایک بجکر دس منٹ پر اڑان بھری تھی اور اپنے مقررہ وقت پر کراچی پہنچ گئی تھی لیکن لینڈنگ سے چند لمحے قبل جناح انٹرنیشنل ایئرپورٹ سے متصل علاقے ماڈل کالونی میں گر کر تباہ ہو گئی تھی۔

پی آئی اے طیارہ حادثے میں دو مسافر خوش قسمتی سے محفوظ رہے تھے تاہم باقی تمام مسافر بمعہ اسٹاف اس المناک حادثے میں جان کی بازی ہار گئے تھے۔

حادثے کے نتیجے میں رہائشی علاقے کے مکانات کو بھی نقصان پہنچا تھا جس کے بعد حکومت کی جانب سے واقعے کی فوری تحقیقات کا حکم جاری کیا گیا تھا۔