نظام شمسی کے سیارے زحل  (سیٹرن) کے گرد 20 نئے چاند دریافت ہوئے ہیں  جس کے بعد سب سے زیادہ چاند والے سیارے کی فہرست میں زحل نے مشتری (جوپیٹر) کو پیچھے چھوڑ دیا ہے۔

تفصیلات کے مطابق سائنس کی دنیا میں بڑی تحقیق سامنے آئی ہے۔یہ تحقیق  ہوائی میں موجود کارنیگی  انسٹیٹیوشن آف سائنس  کی جانب سے کی گئی ہے۔

انسٹیٹیوٹ کے سائنسدانوں نے  ’سوبارو ٹیلیسکوپ ‘ کی مدد سے زحل  کے گرد نئے چاند دریافت کیے جن کا قطر 3 میل ہے۔

 سائنس دانوں کا کہنا ہے کہ سیارہ زحل  کے گرد چاند کی تعداد اب 82 ہوگئی ہے۔اس سے قبل سب سےزیادہ چاند والا سیارہ مشتری تھا جس کے گرد 79 چاند موجود ہیں۔

کارنیگی انسٹی ٹیوٹ آف سائنس کے سکاٹ شیپارڈ ، جو دریافت ٹیم کی رہنمائی کر رہے ہیں ، کہتے ہیں کہ زحل کے آس پاس لگ بھگ 100 چھوٹے چاند ابھی بھی دریافت ہونے کے منتظر ہیں۔

انہوں نے مزید کہا کہ نئے چاند کی دریافت ہمارے نظام شمسی کی تشکیل اور ارتقاء  کے حوالے سے اہم معلومات  کی   فراہمی میں ایک اہم کردار ادا کرتی ہے۔

یہ چاند ان اشیاء کی باقیات ہیں جنہوں نے سیاروں کی تشکیل میں مدد کی۔توان کے بارے میں مزید تحقیق سے ہمیں سیاروں کی تشکیل کے بارے میں مزید جاننے میں مدد کرے گی۔

رپورٹ کے مطابق  دریافت ہونے والے 20 میں سے 17 چاند زحل  کے مدار کے بر عکس چکر لگاتے ہیں ۔نئے چاند 3 سال کے عرصے میں اپنا ایک چکر مکمل کرتے ہیں۔

سائنسدانوں نے بتایا کہ زحل کے 82 چاند میں سے وہ چاند جو سیارے کے قریب ہیں وہ اس  ہی کی سمت میں مدار میں گھومتے ہیں اور اپنا ایک چکر 2 سال کے عرصے میں مکمل کرتے ہیں ۔

زحل ہمارے سورج سے چھٹے نمبر پر جبکہ ہمارے نظام شمسی کا دوسرا بڑا سیارہ ہے۔زحل اور سورج کا درمیانی فاصلہ اوسطاً 1 ارب 40 کروڑ کلومیٹر ہے جو 9 شمسی اکائیوں کے برابر ہے۔

 ایک شمسی اکائی زمین اور سورج کے درمیانی فاصلے کو ظاہر کرتی ہے۔ مدار میں زحل کی حرکت کی رفتار 9.69 کلومیٹر فی سیکنڈ ہے۔

 اس رفتار سے زحل تقریباً 30 زمینی سالوں میں سورج کے گرد ایک چکر مکمل کرتا ہے۔ زحل کے مدار کی نوعیت کے اعتبار سے زحل اور سورج کا درمیانی فاصلہ ساڑھے 15 کروڑ کلومیٹر تک کم ہو سکتا ہے۔