وزیر اعظم عمران خان نے کہا ہے کہ معیشت کے استحکام کے لئے کاروباری طبقے کو ہر ممکنہ سہولت فراہم کرنا حکومت کی اولین ترجیحات میں سے ہے۔

اسلام آباد میں وزیراعظم عمران خان کی زیر صدارت معاشی ٹیم کے اجلاس میں عمران خان کا کہنا تھا کہ عوام کے سامنے ماضی کی صورتحال اور موجودہ بہتری کی صورتحال واضح ہے کیونکہ موجودہ حکومت نے زراعت کے ہر شعبے کے فروغ کے لئے ایک مفصل پالیسی تشکیل دی ہے اور اب ضرورت اس امر کی ہے کہ عوام کو اس پالیسی اور ان اقدامات سے آگاہ کیا جائے۔

وزیراعظم کو بریفنگ دی گئی کہ حالیہ اعدادوشمار کے مطابق برآمدات میں اضافہ ریکارڈ کیا گیا ہے، برآمدات اور درآمدات کی مد میں تجارتی خسارے میں 38 فیصد کمی ہوئی ہے، ٹیکسوں کی وصولیوں میں بہتری، ٹیکس نیٹ میں اضافہ ریکارڈ ہوا ہے، نجی کاروباری سرگرمیوں میں تیزی کا رجحان دیکھنے میں آیا ہے۔

وزیراعظم نے کہا کہ وزارتیں سہ ماہی اہداف، کامیابیوں کے جانچ کے لیے طریقہ کار وضع کریں، طے شدہ اہداف کی تکمیل مقرر کردہ وقت میں مکمل کی جائیں، زراعت کے شعبے سے وابستہ افراد پالیسیوں سے استفادہ کریں۔

عمران خان نے کہا کہ ماضی میں بد انتظامی،مالی و دیگر وجوہات کی بنیاد پر بند ہونے والے کارخانوں اور صنعتی یونٹس کی بحالی پر خصوصی توجہ دینے کی ضرورت ہے جبکہ تعمیرات کے شعبے کو صنعت کا درجہ دینے اور بڑے شہروں میں تعمیرات کے حوالے سے فکس ٹیکس کے نفاذ کی تجویز کو حتمی شکل دی جا رہی ہے۔

انہوں نے اجلاس میں کہا کہ سی پیک منصوبہ نہ صرف پاک چین دوستی کا مظہر ہے، اس منصوبے کے تحت مختلف پراجیکٹس سے نہ صرف ملکی بلکہ علاقائی معیشت پر مثبت اثرات مرتب ہوں گے۔

وزیر اعظم نے کہا کہ معیشت کی بہتری کے لئے روایتی طریقہ کار سے ہٹ کر آؤٹ آف باکس سلوشن اور تجاویز پیش کی جائیں۔

اجلاس میں وزیرِ برائے اقتصادی امور حماد اظہر، وزیرِ منصوبہ بندی مخدوم خسرو بختیار، مشیر خزانہ عبدالحفیظ شیخ، مشیر برائے ادارہ جاتی اصلاحات ڈاکٹر عشرت حسین، معاون خصوصی ڈاکٹر فردوس عاشق، معاون خصوصی یوسف بیگ مرزا، چیئرمین نیا پاکستان ہاؤسنگ اتھارٹی، گورنر اسٹیٹ بنک، چیئرمین ایف بی آر، چیئرمین سرمایہ کاری بورڈ اور چیئرمین احساس پروگرام ڈاکٹر ثانیہ نشتر و دیگر سینئر افسران بھی شریک ہوئے ہیں۔