قومی احتساب بیورو(نیب) نے معیشت کی بہتری، تاجر برادری کے تحفظات اور جائز شکایات کے ازالہ کیلئے کمیٹی قائم کر دی ہے۔

نیب اعلامیے کے مطابق کمیٹی میں سارک چیمبر آف کامرس کے نائب صدرافتخارعلی ملک،پاکستان فیڈریشن آف چیمبر اینڈ انڈسٹری کے صدرداروخان اچکزئی، بینک الفلاح کے سابق صدر عاطف باجوہ،لاہورچیمبر آف کامرس کے صدرانجم نثار،ملت ٹریکٹرز کے چیئرمین سکندرمصطفیٰ خان اور سی پی ایل سی کراچی کے سابق چیف جمیل یوسف شامل ہیں۔

نیب اعلامیے کے مطابق کمیٹی نیب آرڈیننس کے تحت ایگزیکٹو بورڈ کے فیصلے کی روشنی میں قائم کی گئی ہے،جو تاجروں کے مسائل سے متعلق ابتدائی سفارشات چیئرمین نیب کو بھجوائے گی جبکہ ڈپٹی چیئرمین نیب پراسیکیوٹرجنرل نیب اورڈی جی آپریشن نیب پر مشتمل تین رکنی کمیٹی سفارشات کا حتمی جائزہ لے گی۔

بعد ازاں کمیٹی حتمی سفارشات چیئرمین نیب کو ارسال کرے گی،سفارشات پر کسی تاخیر کے بغیر قانون کے مطابق فیصلہ کیا جائے گا اور چیئرمین نیب کا فیصلہ حتمی ہوگا۔

اعلامیے میں کہا گیا ہے کہ کاروباری افراد پرمشتمل کمیٹی کی حیثیت صرف مشاورت کےلیے ہوگی جبکہ نیب کو قانونی اختیارات کے استعمال پرکوئی قدغن نہیں ہوگی،جو ریفرنس دائر ہوچکے ہیں ان سے متعلق شکایات کو نہیں سنا جائے گا۔

نیب اعلامیے کے مطابق نیب کاروباری برادی کا احترام کرتا ہے اور نیب کی پہلی اورآخری وابستگی پاکستان اور اس کی خوشحالی ہے۔