وزیر اعظم عمران خان کا کہنا تھا کہ ایکسپورٹرز کے بقایاجات کی ادائیگی کے حوالے سے اس بات کو یقینی بنایا جائے کہ اس ضمن میں کاروباری برادری کو کسی دقت کا سامنا نہ کرنا پڑے کیونکہ معیشت کی بہتری کے لئے ملکی برآمدات میں اضافہ کلیدی اہمیت کا حامل ہے۔

وزیرِ اعظم عمران خان کی زیر صدارت حکومتی معاشی ٹیم کا اجلاس ہوا۔

وزیر اعظم نے کہا کہ ایکسپورٹرز کو  ہر ممکن سہولت فراہم کرنا اور انکو درپیش مسائل دور کرنا حکومت کی اولین ترجیحات میں شامل ہے بعض کاروباری حلقوں کی جانب سے بقایا جات کے نئے نظام کے حوالے سے مشکلات کی شکایات سامنے آئی ہیں انکا فوری طور پر ازالہ کرنے کے لئے اقدامات کیے جائیں۔

عمران خان کا کہنا تھا کہ فوڈ بینک پروگرام  حکومت کے وژن اور فلاحی سرگرمیوں سے مطابقت رکھتا ہے اور حکومت اس پروگرام کو شروع کرنے کے لئے مطلوبہ وسائل  و ماہانہ اخراجات کی فراہمی میں تعاون کرے گی۔

 اجلاس میں کاروباری برادری کے ریفنڈز، تعمیرات کے شعبے  کے فروغ خصوصاً کم آمدنی والے افراد کے لئے ملک بھر میں پچاس لاکھ گھروں کی تعمیر کے منصوبے میں پیش رفت کا جائزہ لیا گیا جبکہ غیر سرکاری فلاحی تنظیم اخوت کی معاونت سے “فوڈ بنک”پروگرام  کے اجراء کے حوالے سے معاملات زیر غور آئے۔

 مشیر خزانہ  عبدالحفیظ شیخ اور چیئرمین  ایف بی آر شبر زیدی نے اجلاس کو ایکسپورٹرز کے ریفنڈز (بقایا جات) کی ادائیگی کے لئے کیے جانے والے اقدمات پر تفصیلی بریفنگ دی، دوسری جانب چیئرمین نیا پاکستان ہاؤسنگ اتھارٹی لیفٹینٹ جنرل (ر) انور علی حیدر نے اجلاس کو تعمیرات کے شعبے کے فروغ خصوصاً کم آمدنی والے افراد کے لئے ہاؤسنگ منصوبے میں پیش رفت سے آگاہ کیا۔

سابق وزیرِ خزانہ شوکت ترین نے اجلاس کو غیر سرکاری فلاحی تنظیم اخوت کی معاونت سے شروع کیے جانے والے “فوڈ بنک”پروگرام کے  اجراء کے حوالے سے آگاہ کیا۔

اجلاس میں  وزیرِ مواصلات مراد سعید، وزیر برائے اقتصادی امور حماد اظہر، وزیر برائے فوڈ سیکورٹی مخدوم خسرو بختیار، وزیرِ نجکاری میاں محمد سومرو، وزیر منصوبہ بندی اسد عمر، وزیرِ توانائی عمر ایوب، مشیر تجارت عبدالرزاق داؤد، مشیر خزانہ عبدالحفیظ شیخ، مشیر ڈاکٹر عشرت حسین، معاون خصوصی ندیم بابر، چیئرمین سرمایہ کاری بورڈ سید زبیر گیلانی، سابق وزیرِ خزانہ شوکت ترین،گورنر اسٹیٹ بنک رضا باقر، چیئرمین ایف بی آر شبر زیدی و سینئر افسران شریک ہوئے۔