ترجمان وزارت خزانہ نے کہا ہے کہ مالی سال کے پہلے چھ ماہ میں ترسیلات زر 11.4 ارب ڈالر تک پہنچ گئیں جبکہ سال کے اختتام تک ترسیلات زر کا حجم 24 ارب ڈالر کے ہدف تک پہنچ جائے گا۔

تفصیلات کے مطابق وزارت خزانہ سے جاری ایک بیان میں کہا گیا ہے کہ نئے حکومتی اقدامات اور گذشتہ پانچ سالوں کے اعداد و شمار کو سامنے رکھتے ہوئے جاری مالی سال کے دوسرے وسط میں ماہ رمضان اور عید الفطر کے تہوار کی وجہ سے ترسیلات زر کی آمد میں خاطر خواہ اضافہ ہو گا اور 24 ارب ڈالر ترسیلات زر کا ہدف آسانی سے عبور ہو جائے کا امکان ہے۔

ترجمان وزارت خزانہ نے کہا کہ بیرون ملک پاکستانیوں نے دسمبر 2019ء میں 2.097  ارب ڈالر کی ترسیلات زر پاکستان بھجوائیں جبکہ اس سے پچھلے ماہ نومبر2019ء کے مہینے میں ترسیلات زر کا حجم1.819 ارب ڈالر رہا تھا۔

تر جمان وزارت خزانہ نے یہ بھی کہا کہ پاکستانی کے خلیجی ریاستوں کے ساتھ تعلقات میں نمایاں بہتری سے وہاں کے کاروباری طبقے کا پاکستانی افرادی قوت پر اعتماد بڑھا ہے جس کی وجہ سے ان ممالک میں پاکستانی افرادی قوت کی مانگ اور کھپت میں اضافہ ہوا ہے۔

حکومت کے اقدامات سے معیشت استحکام کی جانب گامزن ہے، وزارت خزانہ

  اپنے بیان میں تر جمان وزارت خزانہ کا کہنا تھا کہ دسمبر2019ء سے بیرون ملک سے ایک سو ڈالر سے زائد اور دو سو ڈالر سے کم ترسیلات زر پاکستان بھجوانے پر اٹھنے والے دس سعودی ریال کے برابر لاگت کے مساوی رقم واپس کی جائے گی۔اسی طرح دو سو ڈالر یا اس سے زائد حجم کی ترسیلات زر کے پاکستان بھجوانے پر بیس سعودی ریال کے برابر اٹھنے والے اخراجات کی واپسی کا سلسلہ جاری رہے گا۔

تر جمان وزارت خزانہ کا مزید کہنا تھا کہ ترسیلات زر میں اضافہ کے لیے حکومتی اقدامات بالخصوص ٹی ٹی چارجز سکیم کے تحت ترسیلات وطن بھجوانے پر اٹھنے والے اخراجات کی واپسی، ادائیگیوں کے نظام میں خاطر خواہ بہتری، سعودی عرب کی جانب سے پاکستانیوں کے لیے ویزا میں نرمی اور افرادی قوت کی بیرون ملک کھپت میں گذشتہ سال جنوری دسمبر کی382,000 کی تعداد کی نسبت امسال625,000 تک اضافہ سے ترسیلات زر کی پاکستان آمد میں آنے والے مہینوں میں مزید اضافہ ہو گا۔