وزیراعظم عمران خان کی زیر صدارت اجلاس ہوا جس میں ریاستی ملکیتی اداروں کی کارکردگی میں بہتری کی غرض سے اقدامات کے حوالے سے جائزہ بھی لیا گیا۔

اجلاس میں وزارت پیٹرولیم اور توانائی کی جانب سے گذشتہ 18 ماہ میں ذیلی اداروں میں انتظامی ڈھانچے میں اصلاحات سے متعلق بریفنگ دی گئی اور ساتھ ہی محصولات میں اضافے اور ان اداروں کی مجموعی کارکردگی میں بہتری کے ضمن میں لئے گئے اقدامات سے آگاہ کیا گیا۔

 شرکاء کو وزارت توانائی اور پیٹرولیم کو درپیش مسائل اور ان کے حل کے لیے زیر غورتجاویز پر بھی بریفنگ دی گئی۔

 اجلاس میں وزیراعظم کا کہنا تھا کہ توانائی کے شعبے میں درپیش  مسائل پر قابو پانے کیلئے حکومت ہنگامی بنیادوں پر اقدامات لے رہی ہے جبکہ اس شعبے میں سنگین انتظامی و مالی مسائل  ہمیں ورثے میں ملے ہیں۔

وزیراعظم کا کہنا تھا کہ حکومت کی اولین ترجیح رہی ہے کہ ان مسائل کی وجہ سے عوام الناس پر کم سے کم بوجھ پڑے کیونکہ توانائی کے شعبے میں درپیش مسائل پر قابو پانے کے لئے حکومت کو ہنگامی بنیادوں پر اقدامات لینے ہوں گے۔

پاکستان مصر کے ساتھ برادرانہ تعلقات کو انتہائی اہمیت دیتا ہے، صدر مملکت

اجلاس میں عمران خان کا کہنا تھا کہ ملک بھر میں بھرپور آگاہی مہم چلائی جائے اور عوام کو مسائل کی نوعیت اور انکے حل کے لئے حکومت کی جانب سے کی جانے والی کوششوں پر اعتماد میں لیا جائے۔

وزیراعظم نے کہا کہ بجلی و گیس کی چوری میں ملوث عناصر کو عوام کی مدد سے قانون کی گرفت میں لایا جائے جس کے لئے محض  انتظامیہ کی سطح پر پر تبدیلیاں  موجودہ صورتحال کے پیش نظر ناکافی ہوں گی۔

وزیر اعظم نے اجلاس میں بتایا کہ وزارت توانائی اور پیٹرولیم میں ہر سطح پر بہترین پروفیشنلز اور ٹیکنالوجی پر عبور رکھنے والے افراد کی خدمات حاصل کرنا ہوں گی تاکہ ہر سطح پر موجود مسائل کے  حل کے بہترین افرادی قوت کو برؤے کار لایا جائے۔

ان کا مزید کہنا تھا کہ سالہا سال کی کرپشن اور نااہلی نے نظام کی بنیادوں کو کھوکھلا کر دیا ہے۔

 اجلاس میں تجویز پیش کی گئی کہ وزارتوں میں  پالیسی، ریگولیشن،عمل درآمد، مالی اور انتظامی امور سے متعلقہ معاملات  متعلقہ شعبوں میں مہارت رکھنے والے افراد کے سپرد کیے جائیں تاکہ ہر عہدیدار اپنے  دائرہ کارمیں بہتر طریقے سے ذمہ داریاں سر انجام دے سکے۔

پیش کردہ تجاویز کے متعلق عمران خان کا کہنا تھا کہ ہر ادارے کے  سربراہ کی کارکردگی کو اہداف کی تکمیل سے منسلک کیا جائے تاکہ کارکردگی کا جائزہ مقررہ وقت میں اہداف کے حصول کی بنیاد پر لیا جائے۔

 اجلاس میں وزیراعظم نے مزید کہا کہ کرپشن سے آلودہ نظام  اگر ڈیلیور نہیں کر رہا تو اس کا بوجھ  کسی صورت عام آدمی ڈالنے کی اجازت نہیں دی جائے گی۔

اجلاس میں وزیراعظم نے ہدایت کی ہے کہ وزارت توانائی اور پیٹرولیم  توانائی سے متعلقہ مسائل کے حل کے لئے ایمرجنسی پروگرام مرتب کئے جائے اور اس امر کو یقینی بنایا جائے کہ سسٹم کی اصلاح کے عمل کا بوجھ عام آدمی پر کم سے کم پڑے۔

اجلاس میں عمر ایوب خان، اسد عمر، محمد میاں سومرو، غلام سرور خان، ڈاکٹر عبدالحفیظ شیخ، عبدالرزاق داود، ڈاکٹر فردوس عاشق اعوان بھی شریک ہوئے جبکہ معاون خصوصی ندیم بابر اور  سینئر سرکاری افسران بھی اجلاس میں موجود تھے۔