تین سال کے دوران  بجلی کا پانچواں بڑا بریک ڈاؤن ہونے پر نیپرا نے سخت نوٹس لے لیا۔

نیشنل الیکٹرک پاور سپلائی ریگولیٹری اتھارٹی(نیپرا) نے ملک میں ہونے والے بلیک آؤٹ کا سخت نوٹس لیتے ہوئے نیشنل ٹرانسمیشن اور ڈسپیچ کمپنی (این ٹی ڈی سی) سے رپورٹ طلب کر لی۔

نیپرا حکام کا کہنا ہے کہ اس سے قبل 2021 اور 2022 میں ملک میں ہونے والے بلیک آؤٹ اور ٹاور گرنے کے واقعات پر  این ٹی ڈی سی پر  جرمانے کیے جاچکے ہیں۔

نیپرا حکام کا کہنا ہے کہ اتھارٹی مستقبل میں ایسے واقعات کو روکنے کے لیے مسلسل ہدایات اور سفارشات جاری  کرتی رہی ہے۔

مزید پڑھیں: ملک بھر میں بجلی کا ایک اور بڑا بریک ڈاؤن

واضح رہے کہ  نیشنل ٹرانسمیشن اور ڈسپیچ کمپنی ( این ٹی ڈی سی)  ملک میں بجلی کا ترسیلی نظام بہتر کرنے میں ناکام ہوگئی۔

ملک میں گزشتہ تین سالوں کے دوران پانچواں  بڑا بریک ڈاؤن ہوگیا۔

ستمبر 2021میں جامشورو گرڈ اسٹیشن مین فنی خرابی آئی جس سے دو ہزار میگاواٹ بجلی سسٹم سےنکلنے سے آدھا ملک اندھرے میں ڈوبا۔

انکوائری کمیٹی بنی اور نیپرا نے این ٹی ڈی سی پر ایک کروڑ  روپے کا  جرمانہ  عائد کیا۔

جنوری 2021 میں گدو پاور پلانٹ ٹرپ ہونے سے ملک میں پھر بجلی کا بریک ڈاؤن ہوا۔

سال 2022 مارچ  میں جامشورو ٹرانسمیشن لائنز کے ٹاور جلنے سے 1320 میگاواٹ بجلی سسٹم سے نکل گئی جس کے باعث آدھا ملک اندھیرے  میں ڈوب گیا۔

13 اکتوبر 2022 کے دن پھر جنوبی اضلاع میں بجلی کا ترسیلی نظام بیٹھ گیا جس سے  کراچی سمیت ملک کے جنوبی اضلاع پھر بجلی سے محروم ہوئے۔ نیپرا نے این ٹی ڈی سی پر سات کروڑ  روپے کا جرمانہ عائد کیا۔

مزید پڑھیں: بجلی کے بریک ڈاؤن کے باعث نظام زندگی بری طرح متاثر

آج صبح ملک میں پانچواں بڑا بریک ڈاؤن ہوا جس سے اسلام آباد، کراچی ، کوئٹہ اور حیدر آباد سمیت آدھے سے  زیادہ ملک متاثر ہوا۔

وزارت توانائی کی جانب سے جاری بیان میں کہا گیا کہ  آج صبح سات بجکر 34 منٹ پر  نیشنل گرڈ کی سسٹم فریکوئنسی کم   ہونے سے بجلی کے نظام میں بڑا بریک ڈاؤن ہوا جس کی  بحالی پر کام تیزی سے جاری ہے۔

وزارت توانائی کا کہنا ہے کہ  وارسک سے گرڈ اسٹیشنوں کی بحالی کا آغاز کر دیا گیا ہے۔