کراچی: آل پاکستان ٹیکسٹائل ملز ایسوسی ایشن (اپٹما) کی جانب سے وزیر اعظم شہباز شریف کو خط لکھا گیا ہے۔

تفصیلات کے مطابق وزیر اعظم کو لکھے گئے اپٹما کے خط کا موضوع “برآمدات کے بغیر معاشی بحالی نہیں” ہے۔

خط میں کہا گیا ہے کہ ملکی 60 فیصد ایکسپورٹ شعبے ٹیکسٹائل کا مدعا پیش کررہے ہیں، عالمی ٹیکسٹائل مارکیٹ میں پاکستان کا حصہ 2.2 فیصد سے کم ہوکر 1.76 فیصد ہوگیا ہے۔

اپٹما نے وزیر اعظم کو لکھے گئے خط میں کہا کہ ٹیکسٹائل برآمدات مالی سال 22 میں 39.59 ارب ڈلر تھیں، مالی سال 23 میں 35.21 ارب ڈالر رہیں، ٹیکسٹائل کی 50 فیصد پیداواری صلاحیت استعمال نہیں ہورہی ہے، خطے سے مطابقت رکھتے بجلی کے نرخ واپسی سے مزید 25 فیصد صلاحیت بند ہوجائے گی۔

اپٹما نے اپنے خط میں بتایا کہ عالمی خریداروں کو قیمت اور وقت پر مال بنا کر دینا شدید متاثر ہے، بھارت اور بنگلہ دیش اپنا حصہ بڑھا رہے ہیں، بھارت میں ایکسپوٹرز کو بجلی 6 سینٹ، بنگلہ دیش میں 8 اور پاکستان میں 16 سینٹ یونٹ ہے۔

خط میں کہا گیا کہ بنگلہ دیش میں شرح سود 6، بھارت میں 5 سے 7 اور پاکستان میں 22 فیصد ہے جبکہ  ہمارے بجلی کے نرخ میں 15.62 کراس سبسڈی، پیداوار اور ترسیل کے نقصانات ہیں، ہمارے انتظام کے نقصانات برآمد نہیں کئے جاسکتے ہیں۔

آل پاکستان ٹیکسٹائل ملز ایسوسی ایشن نے اپنے خط میں مزید کہا کہ مناسب موافق پالیسیوں سے ٹیکسٹائل شعبہ 10 ارب اضافی برآمدات کرسکتا ہے، عدم توجہ سے ٹیکسٹائل برآمدات کو 4 سے 5 ارب ڈالر کم ہوسکتی ہیں۔