اسلام آباد: پاکستان میں کاروباری ماحول میں بہتری کی خبر، ایس ای سی پی (سیکیورٹیز اینڈ ایکسچینج کمیشن آف پاکستان) نے فروری 2025 کے دوران نئی کمپنیوں کی رجسٹریشن کے اعدادوشمار جاری کر دیے ہیں۔

ایس ای سی پی کے مطابق اس ماہ میں 3 ہزار 46 نئی کمپنیوں نے اپنے کاروبار کے آغاز کے لیے رجسٹریشن کرائی جس سے ملک میں رجسٹرڈ کمپنیوں کی کل تعداد 2 لاکھ 46 ہزار 608 تک پہنچ گئی ہے۔

ایس ای سی پی کی جانب سے جاری کردہ اعدادوشمار میں بتایا گیا ہے کہ فروری 2025 میں رجسٹرڈ ہونے والی کمپنیوں میں 58 فیصد حصہ پرائیویٹ لمیٹڈ کمپنیز کا تھا جبکہ 39 فیصد سنگل ممبر کمپنیوں نے رجسٹریشن کروائی۔

ایس ای سی پی نے بتایا کہ سنگل ممبر کمپنیوں کی رجسٹریشن ماہانہ بنیاد پر 1 فیصد زائد ہوئی ہے جو کاروبار کے بڑھتے ہوئے اعتماد کی علامت ہے۔

ایس ای سی پی کا کہنا ہے کہ پبلک اَن لسٹڈ کمپنیوں، غیر منافع بخش تنظیموں، اور تجارتی تنظیموں نے بھی اس ماہ میں اپنی کمپنیاں رجسٹر کرائیں جو کہ کاروباری طبقے کی جانب سے معاشی ترقی پر اعتماد کا اظہار ہے۔

ایس ای سی پی نے مزید کہا کہ اس ماہ کے دوران تین غیر ملکی کمپنیوں نے بھی پاکستان میں اپنے کاروبار کا آغاز کیا ہے۔

سب سے زیادہ رجسٹریشن کن شعبوں میں ہوئی؟

فروری میں سب سے زیادہ رجسٹریشن آئی ٹی اور ای کامرس کے شعبوں میں ہوئی، جہاں ایک ماہ کے دوران 635 نئی کمپنیاں رجسٹر ہوئیں۔ اس کے بعد تجارتی شعبے میں 389 اور خدمات کے شعبے میں 379 کمپنیاں رجسٹر ہوئیں۔

علاوہ ازیں ریئل اسٹیٹ ڈویلپمنٹ اور کنسٹرکشن کے شعبے میں 296، سیاحت اور ٹرانسپورٹ میں 165 جب کہ خوراک و مشروبات میں 139 نئی کمپنیاں رجسٹرڈ ہوئیں۔

تعلیم کے شعبے سے 104، مارکیٹنگ سے 78، مائننگ سے 76، ٹیکسٹائل سے 75 اور انجینئرنگ کے شعبے سے 67 کمپنیاں رجسٹرڈ ہوئیں۔

ڈیجیٹل رجسٹریشن کا بڑھتا ہوا رجحان

ایس ای سی پی نے یہ بھی بتایا کہ 99 فیصد کمپنیوں کی رجسٹریشن ڈیجٹل طریقے سے کی جا رہی ہے جو کاروباری عمل میں جدیدیت اور آسانی کو ظاہر کرتا ہے۔

پاکستان میں کاروباری رجسٹریشن میں یہ تیزی ملکی معیشت کے لیے مثبت اشارہ ہے اور اس سے ظاہر ہوتا ہے کہ کاروباری طبقہ ملک میں کاروباری مواقع اور اقتصادی ترقی پر پراعتماد ہے۔