اسلام آباد: ہفتہ وار بنیادوں پر مہنگائی کی شرح میں 0.24 فیصد اضافہ ریکارڈ کیا گیا ہے۔

ملک میں مہنگائی کی صورتحال پر ادارہ شماریات نے ہفتہ وار رپورٹ جاری کردی ہے جس کے مطابق گذشتہ ہفتے کے دوران مہنگائی کی شرح میں 0.24 فیصد کا معمولی اضافہ ریکارڈ کیا گیا۔

تاہم سالانہ بنیادوں پر مہنگائی کی مجموعی شرح میں 0.80 فیصد کمی ریکارڈ کی گئی ہے جب کہ ایک ہفتے کے دوران روزمرہ استعمال کی 9 اشیاء کی قیمتوں میں اضافہ، 17 اشیاء کی قیمتوں میں کمی جب کہ 25 اشیاء کی قیمتوں میں استحکام دیکھا گیا۔

مہنگی ہونے والی اشیاء

مہنگی ہونے والی اشیاء میں برائلر مرغی سرفہرست رہی جس کی فی کلو قیمت میں 40 روپے 15 پیسے اضافہ ہوا۔ انڈے فی درجن 18 روپے 27 پیسے مہنگے ہوئے جبکہ چینی کی فی کلو قیمت میں 3 روپے 26 پیسے کا اضافہ ریکارڈ کیا گیا۔

یہ بھی پڑھیں: ملکی معاشی اشاریے بہتری کی جانب گامزن

بیف کی قیمت میں بھی 16 روپے 28 پیسے فی کلو اضافہ ہوا، مزید جن اشیاء کی قیمتوں میں اضافہ ہوا ان میں دال ماش، مٹن، گُڑ اور بچوں کا خشک دودھ شامل ہیں۔

سستی ہونے والی اشیاء

دوسری جانب سستی ہونے والی اشیاء میں ٹماٹر، لہسن، آلو اور پیاز شامل رہے۔ ٹماٹر فی کلو 4 روپے 61 پیسے، لہسن 20 روپے 33 پیسے، آلو 2 روپے 19 پیسے اور پیاز 1 روپے 1 پیسے سستے ہوئے۔

ایل پی جی کا گھریلو سیلنڈر، پیٹرولیم مصنوعات، دال مسور اور دال مونگ کی قیمتوں میں بھی کمی ریکارڈ کی گئی۔

علاوہ ازیں چاول، چائے کی پتی، تازہ دودھ، دہی اور دیگر اشیاء سمیت 25 آئٹمز کی قیمتیں مستحکم رہیں۔