پاکستان میں گاڑی خریدنے کے خواہشمند افراد کے لیے ایک اہم خبر سامنے آگئی۔

بجٹ 2025-26 میں 1300 سی سی سے 1800 سی سی تک کی گاڑیوں پر اضافی ٹیکس کی تجویز سے ٹویوٹا یارس اور کرولا آلٹس کی قیمتیں مزید بڑھنے کا امکان ہے۔

بجٹ 2025-26 میں مجوزہ ٹیکس

حکومت نے بجٹ 2025-26  میں 1300 سی سی سے زائد گاڑیوں پر 2 فیصد فیڈرل ایکسائز ڈیوٹی لگانے کی تجویز دی ہے جس کا اثر خاص طور پر ٹویوٹا کے مقبول ماڈلز پر پڑنے والا ہے۔

ممکنہ قیمتیں، تجزیہ

اگر یہ ٹیکس نافذ ہوتا ہے تو ٹویوٹا یارس 1.3 سی وی ٹی کی قیمتوں میں اضافہ ہوگا جس کی موجودہ قیمت 43 لاکھ 90 ہزار ہے، بعد ازاں اس کی نئی قیمت 44 لاکھ 80 ہزار ہوجائے گی۔

اسی طرح کرولا آلٹس 1.6 کی موجودہ قیمت 59 لاکھ روپے ہے جو اضافے کے بعد 60 لاکھ 20 ہزار تک پہنچ جائے گی جب کہ کرولا آلٹس گرینڈ 1.8 سی وی ٹی کی قیمت میں 1 لاکھ 20 ہزار سے دیڑھ لاکھ روپے تک بڑھنے کا امکان ہے۔

قیمت میں اضافے کی دیگر وجوہات

عالمی سطح پر خام مال مہنگا ہونے کے باعث پیداواری لاگت میں اضافہ ہوا ہے جب کہ ڈالر ریٹ میں عدم استحکام اور مقامی سطح پر سی کے ڈی کٹس کی قیمتوں میں بھی اضافہ ہوا ہے۔

خریداروں کے لیے مشورہ

اگر آپ ٹویوٹا یارس یا کرولا آلٹس خریدنے کا ارادہ رکھتے ہیں تو بجٹ کے اطلاق سے پہلے بُکنگ کروانا فائدہ مند ہوسکتا ہے تاکہ اضافی قیمتوں سے بچا جاسکے۔