ہونڈا اٹلس نے پاکستان میں ایک ساتھ دو نئی موٹرسائیکلیں لانچ کرکے بائیک مارکیٹ میں نئی جان ڈال دی ہے۔ نئی سی جی 150 اور کمپنی کی پہلی الیکٹرک اسکوٹر آئیکن ای اب باضابطہ طور پر دستیاب ہیں۔

دو پہیوں کی دنیا میں ہونڈا اٹلس ایک بڑا نام ہے اور اب کمپنی نے اپنے انسٹاگرام پیج پر سی جی 150 کی جھلک شیئر کرکے شائقین کو خوش کردیا ہے۔

 سی جی 150 کا نیا ماڈل: اسٹائل اور طاقت کا امتزاج

ہونڈا سی جی 150 کا نیا ورژن ایک طاقتور 4 اسٹروک ایس او ایچ سی انجن کے ساتھ پیش کیا گیا ہے جو نہ صرف بہتر کارکردگی بلکہ سیلف اسٹارٹ اور کک اسٹارٹ دونوں سہولتوں کے ساتھ آتا ہے۔

اس کی قیمت 4 لاکھ 59 ہزار 900 روپے ہے جب کہ یہ موٹر سائیکل نوجوانوں اور روزمرہ کے استعمال کے لیے ایک مثالی انتخاب قرار دی جارہی ہے۔

ہونڈا کی پہلی الیکٹرک اسکوٹر آئیکن ای

پاکستانی مارکیٹ کے لیے خاص طور پر ڈیزائن کی گئی ہونڈا کی پہلی الیکٹرک اسکوٹر ’’آئیکن ای‘‘ بھی اب دستیاب ہے۔ ماحول دوست اور جدید ٹیکنالوجی سے لیس یہ اسکوٹر شہری علاقوں میں روزمرہ سفر کے لیے بہترین ہے۔

اس کی قیمت 4 لاکھ 19 ہزار 900 روپے ہے جب کہ یہ بائیک فیچرزکے لحاظ سے  جدید ڈیزائن، کم لاگت چارجنگ اور ماحول دوست ٹیکنالوجی ہے۔

اہم پیش رفت یا مارکیٹنگ چال؟

موٹر سائیکل انڈسٹری میں اس قدم کو ایک اسٹریٹجک پیش رفت قرار دیا جا رہا ہے، کیونکہ ہونڈا نے ماضی میں اپنی رپورٹ میں بتایا تھا کہ وہ الیکٹرک اسکوٹرز کی لانچنگ پر کام کررہی ہے۔

پاکستان اسٹاک ایکسچینج میں جمع کرائی گئی ایک رپورٹ کے مطابق ہونڈا نے ریگولیٹری اداروں کے ساتھ مکمل ہم آہنگی سے روڈ ٹیسٹنگ اور کوالٹی چیکنگ کے مراحل مکمل کرلیے ہیں۔

پاکستان میں الیکٹرک اسکوٹرز کا مستقبل؟

ہونڈا کا یہ اقدام پاکستان میں الیکٹرک وہیکلز کے مستقبل کی جانب ایک مضبوط قدم سمجھا جارہا ہے۔ بڑھتی ہوئی پیٹرول کی قیمتوں اور ماحولیاتی تحفظ کے تناظر میں الیکٹرک اسکوٹرز کی مقبولیت میں اضافہ یقینی نظر آرہا ہے۔