پاکستان میں الیکٹرک گاڑیوں کی مارکیٹ ایک نئے دور میں داخل ہونے جا رہی ہے۔ دنیا کی صف اول کی پی ایچ ای وی کمپنی بی وائی ڈی نے اپنی جدید ٹیکنالوجی سے لیس بی وائی ڈی شارک 6 پی ایچ ای وی گاڑی کو 25 جولائی 2025 کو لانچ کرنے کا اعلان کردیا ہے۔

بی وائی ڈی شارک 6 پی ایچ ای وی گاڑی پاکستان کی پہلی پلگ ان ہائبرڈ پک اپ گاڑی ہوگی جو 436 ہارس پاور، 650 نیوٹن میٹر ٹارک اور 800 کلومیٹر مجموعی رینج فراہم کرے گی۔

اس گاڑی میں جدید 29.58  کلو میٹر پر آور بیٹری نصب کی گئی ہے جو ایک لیٹر میں 50 کلومیٹر تک کا فاصلہ طے کرسکتی ہے۔

ٹوئن انجن ٹیکنالوجی، شہری اور آفس روڈ ڈرائیو کے لیے بہترین

اس گاڑی میں بی وائی ڈی کی ڈوئل موڈ سوپر ہائبرڈ ٹیکنالوجی شامل ہے جو پہلے الیکٹرک موڈ کو ترجیح دیتی ہے اور پیٹرول انجن کو صرف بیک اپ کے طور پر استعمال کیا جاتا ہے۔

یہ ماڈل شہری ماحول اور آفس روڈ دونوں کے لیے موزوں ہے اور اس میں سینڈ، مڈاور اسنو سمیت مختلف ٹیرین موڈز موجود ہیں۔

ماحول دوست، 62 فیصد کم  کاربن ڈائی آکسائیڈ کا اخراج

گاڑی کی پرفارمنس صرف رفتار میں نہیں بلکہ ماحول دوستی میں بھی شاندار ہے۔بی وائی ڈی شارک 6 روایتی گاڑیوں کے مقابلے میں 62 فیصد کم کاربن ڈائی آکسائیڈ گیسیں خارج کرتی ہے جو کہ کراچی اور لاہور جیسے آلودہ شہروں کے لیے خوش آئند پیش رفت ہے۔

کب دستیاب ہوگی؟

گاڑی کی بُکنگ کا آغاز 25 جولائی 2025 سے ہوگا جب کہ ڈلیوریز ستمبر سے متوقع ہیں۔ کمپنی نے کراچی میں ایک ورکشاپ کے دوران اپنی اس جدید ٹیکنالوجی کو پہلی بار پاکستان میں متعارف کرایا ہے۔

کیا یہ پاکستان کی آٹو انڈسٹری کا ٹرننگ پوائنٹ ہے؟

بی وائی ڈی کی اس پیش رفت سے ملک کی آٹو انڈسٹری میں ایک نیا انقلاب برپا ہونے کی امید ہے۔ کمپنی نے مقامی پیداوار میں سرمایہ کاری کا بھی عندیہ دیا ہے جو طویل مدتی ترقی کے لیے انتہائی اہم قدم ہوگا۔