مالی سال 26-2025 کے پہلے چار ماہ کے دوران پاکستان کی ٹیکسٹائل برآمدات تاریخ کی بلند ترین سطح پر پہنچ گئی ہیں۔

عارف حبیب لمیٹڈ کی رپورٹ کے مطابق مذکورہ عرصے میں ٹیکسٹائل برآمدات 6.4 ارب ڈالر ریکارڈ کی گئیں، جو مذکورہ مدت میں یہ سب سے بڑا تجارتی حجم ہے۔

رپورٹ میں بتایا گیا ہے کہ ویلیو ایڈڈ شعبوں نے اس کارکردگی میں نمایاں حصہ ڈالا۔ نِٹ ویئر کی برآمدات 1.9 ارب ڈالر جبکہ ریڈی میڈ گارمنٹس 1.4 ارب ڈالر تک پہنچیں جو دونوں شعبوں کیلئے بھی پہلے چار ماہ کی ریکارڈ سطح ہے۔

عارف حبیب لمیٹڈ کا کہنا تھا کہ ٹیکسٹائل برآمدات میں اضافہ عالمی مانگ میں بہتری، ویلیو ایڈڈ مصنوعات کی مضبوط کارکردگی اور روپے کی قدر میں استحکام کا نتیجہ ہے۔

 یہ کارکردگی وزیراعظم محمد شہباز شریف کی کاروبار دوست پالیسیوں، برآمدات کے فروغ کے لیے حکومتی ترجیحات اور معاشی نظم و ضبط پر مبنی وژن کا ثمر ہے۔

مزید پڑھیں: ایس آئی ایف سی کے تعاون سے ٹیکسٹائل برآمدات میں تاریخی اضافہ

حکومت نے پالیسی تسلسل، صنعتی سہولت کاری اور برآمدی شعبوں کے لیے سازگار ماحول کو یقینی بنا کر ٹیکسٹائل انڈسٹری کی مسابقتی حیثیت کو بہتر بنایا ہے۔

رپورٹ میں مزید کہا گیا کہ کاروباری اعتماد کی بحالی، توانائی لاگت میں بتدریج استحکام اور برآمدی سیکٹر کیلئے سہولتی اقدامات نے مجموعی تجارتی ماحول کو مزید مضبوط بنایا ہے۔