انسدادِ دہشت گردی عدالت اسلام آباد نے سابق وزیر خارجہ شاہ محمود قریشی کی دہشت گردی کے مقدمات میں عبوری ضمانت میں 18 جولائی تک توسیع کر دی۔

تفصیلات کے مطابق انسداد دہشت گردی عدالت کے جج ابو الحسنات نے شاہ محمود قریشی کیخلاف دہشت گردی کے 2 مقدمات کی سماعت کی۔

شاہ محمود قریشی اپنے وکیل علی بخاری کے ہمراہ عدالت میں پیش ہوئے۔

عدالت نے استفسار کیا کہ دہشت گردی کے تحت درج مقدمات کی تحقیقات میں کیا پیش رفت ہوئی؟ جس پر تفتیشی آفسر نے بتایا کہ ان کا ٹوئٹ لیا ہے، تحقیقات ابھی مکمل نہیں ہوئی۔

وکیل علی بخاری نے موقف اپنایا کہ شاہ محمود قریشی کا کوئی ٹوئٹ ریکارڈ پر نہیں ہے۔

عدالت نے دونوں کیسز میں سماعت 18 جولائی تک ملتوی کرتے ہوئے شاہ محمود قریشی کی عبوری ضمانت میں توسیع کر دی۔

شاہ محمود قریشی کی میڈیا سے گفتگو

دوسری جانب سابق وزیر خارجہ شاہ محمود قریشی نے اسلام آباد ہائی کورٹ کے باہر میڈیا سے گفتگو کرتے ہوئے کہا کہ آج عدالت میں پیش ہوا اور عدالت کو بتایا کہ اس کیس میں شامل تفتیش ہو گئے ہیں، عدالت نے 18 تاریخ دی اور پراسیکیوشن کو رپورٹ جمع کروانے کا کہا۔

انہوں نے کہا کہ کل مولانا فضل الرحمان نے پریس کانفرنس کی ہے اور ن لیگ سے نالا نظر آئے ہیں، پی ڈی ایم کوئی الیکٹورل الائنس نہیں ہے۔

شاہ محمود قریشی نے مزید کہا کہ ن لیگ اور پیپلز پارٹی کے سیاسی راستے جدا ہونگے، ایک نئی دلچسپ سیاست جنم لے رہی ہے۔