اسلام آباد کی انسداد دہشتگردی عدالت نے جوڈیشل کمپلیکس توڑ پھوڑ کیس میں پرویز الہیٰ کا ایک روزہ راہداری ریمانڈ منظور کرلیا۔

تفصیلات کے مطابق جوڈیشل کمپلیکس توڑ پھوڑ حملہ کیس میں چوہدری پرویز الہیٰ کو جج ابو الحسنات ذوالقرنین کی عدالت میں پیش کیا گیا۔

جج ابوالحسنات ذوالقرنین نے کہا کہ پرویزالہیٰ کی کب جان چھوٹے گی؟ جس پر پرویزالہیٰ کے وکیل نے کہا کہ کبھی کسی شہر اور کبھی کسی شہر چکر لگوا رہے ہیں۔

جج ابوالحسنات ذوالقرنین نے کہا کہ آپ لوگوں نے بھی مچکلے جمع نہیں کروائے، جس پر وکیل نے کہا کہ آج کے دن ضمانتی مچلکے جمع کروانے تھے۔

عدالت نے مچلکے جمع کرانے تک پرویز الہیٰ کو جیل بھیج دیا۔

دوسری جانب اینٹی کرپشن پنجاب نے پرویزالہیٰ کے راہداری ریمانڈ کی درخواست دائر کردی جس پر جج ابوالحسنات ذوالقرنین نے سوال کیا کہ پرویزالہیٰ کا راہداری ریمانڈ مانگ رہے ہیں؟

پرویزالہیٰ کے وکیل صفائی سردار عبدالرازق نے دلائل دیے کہ پرویزالہیٰ پر الزام ہے کہ اپنے اسٹاف میں بھرتی کیا، کیا وزیراعلیٰ اپنا چیف سیکرٹری تعینات نہیں کرسکتا؟

وکیل نے کہا کہ کل پرویزالہیٰ کے خلاف مقدمہ درج کیا، کل عدالت نے پرویزالہیٰ کو ڈسچارج کیا، منہ پر فیصلہ مارا، وزیراعلیٰ کے پاس اختیار ہے کہ اپنا اسٹاف تعینات کرے۔

عبدالرازق نے دلائل دیتے ہوئے کہا کہ جنوری سے اب تک سیاسی انتقام کا نشانہ بنایا جارہا ہے، کمرہ عدالت سے ڈسچارج ہوتے ہیں تو پھر گرفتار کرلیتے ہیں، محمد خان نامی شخص کو چیف سیکرٹری تعینات کرنا کہاں سے اختیارات سے تجاوز ہے؟

وکیل صفائی سردار عبدالرازق نے اینٹی کرپشن کے راہداری ریمانڈ کی استدعا کی مخالفت کرتے ہوئے کہا کہ پرویزالہیٰ کے خلاف کیس ڈسچارج ہونے کے بعد درک کیا گیا، عدالت پرویزالہیٰ کا راہداری ریمانڈ مسترد کر سکتی ہے۔

دوران سماعت تفتیشی افسر نے عدالت کو بتایا کہ پرویزالہیٰ کے خلاف اینٹی کرپشن کی انکوائری چل رہی تھی۔ جس پر جج ابوالحسنات ذوالقرنین نے پرویزالہیٰ سے سوال کیا کہ کیا آپ کو معلوم ہے کہ آپ کے خلاف اینٹی کرپشن کی انکوائری چل رہی؟ پرویزالہیٰ نے جواب دیتے ہوئے کہا کہ میرے تو فرشتوں کو بھی معلوم نہیں کہ میرے خلاف اینٹی کرپشن کی انکوائری چل رہی ہے۔

تفتیشی افسر نے کہا کہ پرویزالہیٰ کو 7 ستمبر کو اینٹی کرپشن نے شامل تفتیش کیا ہے۔

 وکیل صفائی سردار عبدالرازق نے کہا کہ وزیراعلیٰ کی مرضی جسے چاہیں چیف سیکرٹر پنجاب تعینات کرے، کیا تعینات ہونے والے چیف سیکرٹری پنجاب کو گرفتار کیا، جس پر تفتیشی افسر نے کہا کہ تعینات ہونے والے چیف سیکرٹری پنجاب کو بطور ملزم مقدمہ میں نامزد کیا ہے۔

جج ابوالحسنات ذوالقرنین نے وکیل سی سوال کیا کہ انکوائری بتائیں کب سے شروع ہوئی ہے؟ وکیل صفائی سردار عبدالرازق نے کہا کہ رات کو ڈی جی اینٹی کرپشن بیٹھ کر مقدمہ بناتا رہا ہے، لاہور ہائیکورٹ نے کہا پرویزالہیٰ کو گرفتار نہیں کرسکتے، پھر کیسے گرفتاری کررہے ہیں؟

پرویزالہیٰ نے اپنے موقف میں کہا کہ کل لاہور کے جج نے پوچھا کوئی کیس تو نہیں ان کے خلاف؟ پراسیکیوشن نے جج کو بتایا کہ کوئی مقدمہ پرویزالہیٰ کے خلاف نہیں۔

آفیشل سیکرٹ ایکٹ کی خصوصی عدالت کے جج ابوالحسنات ذوالقرنین نے پرویز الہیٰ کا ایک روزہ راہداری ریمانڈ منظور کرلیا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں