لاہور: سابق وزیراعلیٰ پنجاب چوہدری پرویز الہٰی کے بیٹے چوہدری مونس الہٰی کے خلاف منی لانڈرنگ کیس میں اشتہاری کی کارروائی شروع کر دی گئی ہے۔

تفصیلات کے مطابق ایف آئی اے منی لانڈرنگ مقدمے میں بڑی پیش رفت سامنے آئی ہے، تاہم عدالتی حکم پر مونس الہٰی کے خلاف اشتہاری کی کارروائی شروع کر دی گئی ہے۔

مونس الہٰی سے متعلق مختلف جگہوں پر اشتہارات آویزاں کر دیئے گئے ہیں جس میں تحریر کیا گیا ہے کہ مونس الہٰی کو آج عدالت میں پیش ہونے کی مہلت دی گئی تھی لیکن وہ روپوش ہیں اور وہ عدالت میں پیش نہیں ہو رہے۔

یاد رہے کہ سپیشل سینٹرل عدالت لاہور نے منی لانڈرنگ کیس میں اشتہاری کی کارروائی شروع کی ہے جبکہ ایف آئی اے نے چالان عدالت میں جمع کرا رکھا ہے۔

رواں ماہ ایف آئی اے نے مونس الہٰی کے خلاف منی لانڈرنگ کیس میں عدالتی حکم پر بینک اکاؤنٹس منجمد کردیے تھے، دستاویز کے مطابق مونس الہٰی کے لاہور میں 8 مختلف بینک اکاؤنٹس منجمد کیے گئے ہیں، ان کے مختلف بینک اکاؤنٹس میں 48 کروڑ 76 لاکھ سے زائد کی رقم آئی اور انہوں نے ساری رقم ان بینک اکاؤنٹس سے نکلوا لی۔

دستاویز میں بتایا گیا تھا کہ مونس کے رقم جمع کرانے اور منتقل کرنے میں استعمال ہونے والے بینک اکاؤنٹس منجمد کردیے گئے ہیں، ان کے مختلف بینک اکاؤنٹس منی لانڈرنگ کیلئے استعمال ہوئے ہیں۔