سندھ ہائی کورٹ میں قائم الیکشن ٹریبونل نے سابق وزیر اعظم شہباز شریف کے حلقہ این اے 242 سے کاغذات نامزدگی کی منظوری کیخلاف اپیل مسترد کردی۔

تفصیلات کے مطابق الیکشن ٹریبونل میں کراچی کے علاقے کیماڑی میں قومی اسمبلی کے حلقہ این اے 242 سے سابق وزیر اعظم شہباز شریف کے کاغذات نامزدگی منظور کرنے کے خلاف اپیل پر سماعت ہوئی۔

الیکشن کمیشن نے استفسار کیا کہ اعتراض کنندہ کا کہنا ہے کہ شہباز شریف نے حقائق چھپائے ہیں۔

وکیل شہباز شریف نے بتایا کہ آر او کے سامنے جو اعتراضات تھے وہ مسترد ہوئے ہیں، اسٹیٹ بینک نے لکھ کر دیا ہوا ہے کہ شہباز شریف نے بطور وزیر اعظم تنخواہ نہیں لی، کوئی ٹیکس کوئی واجبات نہیں ہیں۔

وکیل کا کہنا تھا کہ شہباز شریف نے قومی اسمبلی سیکریٹریٹ کا این او سی بھی منسلک کیا ہے، اعتراض کنندہ کا سفری اخراجات سے متعلق الزام بھی درست نہیں۔

الیکشن کمیشن کے وکیل نے کہا کہ کاغذات نامزدگی خود یا تجویز کنندہ، تائید کنندہ کے علاوہ اتھارٹی لیٹر کے ساتھ کوئی بھی جمع کراسکتا ہے۔

الیکشن کمیشن نے ریٹرننگ افسر کے فیصلے کی حمایت کرتے ہوئے شہباز شریف کے کاغذات نامزدگی منظوری کے خلاف اپیل مسترد کردی۔

واضح رہے کہ سندھ ہائی کورٹ کے الیکشن ٹریبونل میں شہباز شریف کے حلقہ این اے 242 سے کاغذات نامزدگی کی منظوری کے خلاف پیپلز پارٹی کے امیدوار مسعود خان مندوخیل نے اپیل دائر کی تھی، جس میں مؤقف اختیار کیا گیا تھا کہ ریٹرننگ آفیسر نے میرے اعتراضات کو مسترد کردیا ہے۔

اپیل میں مزید کہا گیا تھا کہ ریٹرننگ آفیسر (آر او) نے جلد بازی میں قانونی تقاضوں کو نظر انداز کرکے شہباز شریف کے کاغذات نامزدگی کو منظور کیا ہے۔

مسعود خان مندوخیل نے استدعا کی تھی کہ ریٹرننگ افسر کا 29 دسمبر کا فیصلہ کالعدم قرار دیا جائے اور شہباز شریف کے کاغزات نامزدگی مسترد کیے جائیں۔