کراچی: مصطفیٰ عامر قتل کیس میں گرفتار ملزم ارمغان کے قبضے سے ملنے والے اسلحہ کی تحقیقات سی ٹی ڈی سے کروانے کا فیصلہ کیا گیا ہے۔

تفتیشی ذرائع کے مطابق ملزم ارمغان کے پاس ممنوعہ اسلحہ کیسے پہنچا؟ سی ٹی ڈی اس بارے بھی تحقیقات کرے گی۔

ذرائع نے بتایا ہے کہ ماضی میں ممنوعہ اسلحے کی اسمگلنگ میں ملوث گرفتار ملزمان سے بھی تحقیقات کی جائیں گی۔

تفتیشی ذرائع کے مطابق ملزم ارمغان کے گھر سے چھاپے کے دوران امریکی ساختہ اسنائپر گن برآمد ہوا تھا جبکہ ملزم سے ایم پی گن اور اسرائیل ساختہ رائفل بھی ملا تھا، تاہم ملزم سے اسنائپر، ایم پی گن، رائفل اور نائن ایم ایم کی 2700 سے زائد گولیاں بھی برآمد ہوئیں۔

واضح رہے کہ ڈپٹی انسپکٹر جنرل (ڈی آئی جی) سی آئی اے مقدس حیدر نے 14 فروری کو پریس کانفرنس کرتے ہوئے بتایا تھا کہ مقتول مصطفیٰ عامر 6 جنوری کو ڈیفنس کے علاقے سے لاپتا ہوا تھا، مقتول کی والدہ نے اگلے روز بیٹے کی گمشدگی کا مقدمہ درج کروایا تھا۔

اے وی سی سی اور سٹیزنز پولیس لائژن کمیٹی (سی پی ایل سی) اور وفاقی حساس ادارے کی مشترکہ کوششوں سے ملزم کے دوست شیراز کی گرفتاری عمل میں آئی تھی جس نے اعتراف کیا تھا کہ ارمغان نے اس کی ملی بھگت سے مصطفیٰ عامر کو 6 جنوری کو گھر میں تشدد کا نشانہ بناکر قتل کرنے کے بعد لاش اسی کی گاڑی میں حب لے جانے کے بعد نذرآتش کردی تھی۔