جوائنٹ چیفس آف اسٹاف کمیٹی کے چیئرمین جنرل ساحر شمشاد مرزا نے پاک فضائیہ کے آپریشنل ایئر بیس پر جاری فضائی مشق انڈس شیلڈ 2023 کا معائنہ کیا۔
ترجمان پاک فضائیہ کے مطابق جنرل ساحر شمشاد مرزا کی آمد پر سربراہ پاک فضائیہ و ایئر چیف مارشل ظہیر احمد بابر سدھو نے انکا استقبال کیا۔
چیئرمین جوائنٹ چیفس آف اسٹاف کمیٹی کو ایئر پاور سینٹر آف ایکسیلینس میں تربیتی سہولیات کے ساتھ ساتھ فضائی مشق کے دائرہ کار سے آگاہ کیا گیا، جس کا مقصد مشق میں شریک فضائی افواج کے باہمی تعاون کے فروغ اور جدید فضائی جنگی تصورات کو تقویت دینا ہے۔
ایئر چیف نے جنرل ساحر شمشاد مرزا کی جانب سے مکمل حمایت کی تعریف کی اور افواجِ پاکستان کے درمیان ہم آہنگی کے فروغ کے لئے انکی بھرپور کاوشوں کو سراہا۔
سربراہ پاک فضائیہ نے 14 ملکی فضائی مشق انڈس شیلڈ کی اہمیت پر روشنی ڈالی جس کے تحت پاک فضائیہ کی آپریشنل تیاریوں کو فروغ دینے کے ساتھ ساتھ شرکاء کو عصر حاضر کے جنگی چیلنجز سے نمٹنے کے لیے تیاری مہیا کی جا رہی ہے۔
اس موقع پر خطاب کرتے ہوئے پاک فضائیہ کے سربراہ ظہیر احمد بابر سدھو نے کہا کہ موجودہ عالمی سلامتی کی صورت حال اور تغیر پذیر جنگی محرکات مسلح افواج کی بہترین شراکت داری کے متقاضی ہیں۔
ایئر چیف نے مزید کہا کہ مشق نہ صرف شریک فضائی افواج کو اپنی بے مثال مہارت اور آپریشنل صلاحیتوں کو نمایاں کرنے کا منفرد موقع فراہم کررہی ہے بلکہ شریک عسکری دستوں کے رابط اور تعاون کو فروغ دینے کے لیے باہمی مفاہمت کو بھی مستحکم کرے گی۔
مشق کے شرکاء سے خطاب کرتے ہوئے چیئرمین جوائنٹ چیفس آف اسٹاف کمیٹی نے فضائی جنگ کے ہماوقت تغیر پذیر محرکات کے تناظر میں مشترکہ مقاصد کے حصول کے لئے بین الاقوامی فضائی مشقوں کی اہمیت پر زور دیا۔
انہوں نے مشق کے شرکاء کی پیشہ وارانہ مہارت کو سراہتے ہوئے اس تاریخ ساز مشق کے انعقاد پر ایئر پاور سنٹر آف ایکسیلینس کی کاوشوں کو بھی سراہا اور کہا کہ مشق سے شراکت داری کو تقویت دینے اور شریک فضائی افواج کے باہمی تعاون کا فروغ ممکن ہو گا۔
ترجمان پاک فضائیہ نے بتایا کہ انڈس شیلڈ-2023 میں پاکستان، ترکیہ، سعودی عرب، قطر، متحدہ عرب امارات، مصر، عمان، بحرین، آذربائیجان، انڈونیشیا، مراکش، ازبکستان، چین اور ہنگری سمیت 14 فضائی افواج شرکت کر رہی ہیں۔
ترجمان نے مزید کہا کہ انڈس شیلڈ حصہ لینے والی فضائی افواج کے لیے بے مثال مہارت اور آپریشنل صلاحیتوں کو پلیٹ فارم پر لانے کا ایک فقید المثال موقع فراہم کر رہی ہے۔ مشق کے ذریعے عصر حاضر کی جنگی حکمت عملیوں کو بروئےکار لاتے ہوئے فضائی دفاع کے مشترکہ چیلنجز سے مؤثر انداز میں نمٹا جا سکے گا۔
یاد رہے کہ 8 اکتوبر 2023 کو پاک فضائیہ کی جانب سے 14 ملکی بین الاقوامی فضائی مشق انڈس شیلڈ-2023 کا آغاز کردیا گیا تھا۔
اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں
ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں
پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں اور بیل آئیکن پر کلک کریں
مزید پڑھیں
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News