اسلام آباد: یوں تو کالعدم تحریک طالبان پاکستان (ٹی ٹی پی) کی پاکستان کیخلاف دہشت گردی دو دہائیوں سے زیادہ عرصے پر محیط ہے مگر حالیہ دہشت گردی کی لہر نے ایک بڑے خطرے کو جنم دیا ہے۔

تفصیلات کے مطابق افغانستان میں موجود ٹی ٹی پی کے دہشت گرد افغان طالبان کے بھرپور تعاون اور جدید غیر ملکی ساختہ اسلحے کی با آسانی دستیابی کی وجہ سے پاکستان میں دہشت گردی میں اضافہ ہو رہا ہے۔

حالیہ دہشت گردی کی خاص بات ٹی ٹی پی کے دہشت گردوں کی دسترس میں غیر ملکی ساختہ جدید اسلحہ کی فراونی ہے۔

افغانستان میں چھوڑا ہوا امریکی اسلحہ غیر محفوظ ہے
عالمی برادری کو غیر ملکی اسلحہ دہشتگرد تنظیموں کا نوٹس لینا ہو گا#BOLNews #US pic.twitter.com/LqkWs0EYxS

Advertisement

— BOL Network (@BOLNETWORK) November 29, 2023

اس حوالے سے گزشتہ روز جنوبی وزیرستان میں سیکیورٹی فورسز نے خفیہ معلومات کی بناء پر آپریشن کے دوران 8 دہشت گردوں کو جہنم واصل کیا، ہلاک دہشت گردوں کے قبضے سے جدید غیر ملکی اسلحہ جس میں امریکی ساختہ ہتھیار بھی برآمد ہوئے۔

یہ اس بات کا ثبوت ہے کہ افغانستان میں چھوڑا ہوا امریکی اسلحہ غیر محفوظ ہے اور ٹی ٹی پی کو ایک منظم طریقہ کار کے تحت پاکستان میں بدامنی پھیلانے کیلئے مسلط کیا گیا ہے۔

حالیہ دہشت گردی کی وارداتوں کا ذکر کیا جائے تو پشاور، لکی مروت، بنوں اور ڈیرہ اسماعیل خان میں ٹی ٹی پی نے امریکی ساختہ اسلحے سے حملے کئیے جو کہ ٹی ٹی پی کی عسکری قوت میں اضافے کا باعث بنے۔

اگست 2021 میں افغانستان سے امریکی انخلاء کے بعد 7.12 ارب ڈالرمالیت کا جدید امریکی اسلحہ افغانستان میں چھوڑ دیا گیا، یہ اسلحہ افغان طالبان کے غیر منظم ڈھانچے کی بدولت مختلف پاکستان مخالف دہشت گرد تنظیموں کے ہاتھ لگ گیا۔

بلوچ لبریشن آرمی نے بھی انہی ہتھیاروں کا استعمال کرتے ہوئے فروری 2022 میں نوشکی اور پنجگور اضلاع میں ایف سی کیمپوں پر حملے کیا جبکہ 12 جولائی 2023 کو ژوب گیریژن پر ہونے والے حملے میں بھی ٹی ٹی پی کی جانب سے غیر ملکی اسلحے کا استعمال کیا گیا-

6 ستمبر 2023 کو جدید ترین ہتھیاروں سے لیس دہشت گردوں کے ایک بڑے گروپ نے چترال میں دو فوجی چیک پوسٹوں پر حملہ کیا، جس کے نتیجے میں فائرنگ کا شدید تبادلہ ہوا۔

پاکستان میں دہشت گردی کی صورت میں کھیلی جانے والی خون کی ہولی کے تمام تانے بانے افغانستان سے جا ملتے ہیں، آخر یہ غیر ملکی اسلحہ ٹی ٹی پی کے دہشت گردوں کے پاس کہاں سے آ رہا ہے؟

عالمی برادری کو افغانستان میں موجود کثیر مقدار میں غیر ملکی اسلحہ اور دہشت گرد تنظیموں کا نوٹس لینا ہوگا۔