پاک بحریہ اور عمان کی رائل بحریہ کی خلیج عمان میں دو طرفہ بحری مشق ثمرالطیب 2023 اختتام کو پہنچ گئی ہے۔

ترجمان پاک بحریہ کے مطابق مشق میں دونوں بحری افواج کے بحری جہازوں، فضائی اثاثوں اور اسپیشل سروس گروپس نے شرکت کی اور پی این ایس اصلت، فاسٹ اٹیک کرافٹ پی این ایس قوت اور دونوں ممالک کے فضائی اثاثوں نے بھی حصہ لیا۔

ترجمان نے بتایا کہ مشق ثمرالطیب 2023 مختلف نوعیت کے روائتی اور غیر روایتی خطرات سے نمٹنے کیلئے مشترکہ آپریشنز پر مشتمل تھی۔

پاک بحریہ کے ترجمان کا کہنا تھا کہ ثمرالطیب-2023 کے دوران اینٹی ایئر، اینٹی سرفیس وارفیئر اور انسداد دہشت گردی کی مشقوں سے متعلق میری ٹائم آپریشنز کی مشق کی گئی۔

ترجمان پاک بحریہ کے مطابق مشق ثمرالطیب سے پاکستان اور عمان کی بحری افواج کے درمیان ہر دو سال بعد باقاعدگی سے منعقد کی جاتی ہے، مشق کا مقصد باہمی تعاون کو فروغ دینے کے ساتھ سمندر میں غیر قانونی سرگرمیوں کی روک تھام، علاقائی امن اور استحکام کا قیام ہے۔

پاک بحریہ کے ترجمان نے کہا کہ اس مشق میں شمولیت پاک بحریہ کی جانب سے علاقائی استحکام اور بین الاقوامی تعاون کے فروغ کے عزم کا منہ بولتا ثبوت ہے۔

ترجمان کا مزید کہنا تھا کہ مشق “ثمرالطیب”سے دونوں ممالک کے مشترکہ نیول آپریشنز کو فروغ حاصل ہو گا۔