اسلام آباد: عام انتخابات کے دوران زہریلا پروپیگنڈا اور الیکشن ڈیوٹی پر تعینات فوجی دستوں سے متعلق من گھڑت اور مذموم سیاسی پروپیگنڈا بے نقاب ہوگیا۔

الیکشن کمیشن اور وزارت داخلہ کے نوٹیفکیشن کے مطابق آرمی اور سول آرمڈ فورسز کے ٹروپس الیکشن کا عمل مکمل ہونے تک آر اوز کے دفاتر کے باہر سیکیورٹی کے پابند ہیں۔

ڈپلوائمنٹ کا مقصد الیکشن کے حساس عمل کے دوران الیکشن کمیشن اور آراوز کے دفاتر کی سیکیورٹی کو یقینی بنانا ہے، سیکیورٹی کے لئے آرمی اور سول آرمڈ فورسز کے ٹروپس آراوز کے دفاتر کے باہر تعینات ہیں۔

فوجی اور سول آرمڈ فورسز کا الیکشن پروسیس کے ساتھ کوئی تعلق نہیں، فوجی اور آرمڈ فورسز کے دستے صرف  آراوز کے دفاتر کی بیرونی سیکیورٹی کے لیے تعینات ہیں لیکن چند شر پسند سیاسی عناصر آراوز کے دفاتر کے باہر اسپورٹرز کو اکٹھا کر کے امن و امان اور ہنگامہ آرائی کی صورت حال پیدا کرنے کی پوری کوشش کر رہے ہیں۔

شرپسند عناصر ہنگامہ آرائی کر کے سیاسی من پسند فائدہ حاصل کرنا چاہتے ہیں، قانون کے مطابق جب تک وزارت داخلہ اور الیکشن کمیشن کے حکام کو سیکیورٹی تھریٹ رہے گا، سیکورٹی فورسز تعینات رہیں گی۔

چند شر پسند سپورٹرز کو ورغلا کر آراوز کے دفاتر کا سیاسی گھیراؤ قانون کی سخت خلاف ورزی ہے، آر او اوز کے دفاتر کے گھیراؤ کا مقصد مذموم سیاسی فائدے کے سوا کچھ نہیں۔

عوام کو گمراہ کرنے کے لئے شر پسند سیاسی لیڈرز اور اِنکے سپورٹرز آراوز کے دفاتر کے باہر تعینات ٹروپس کو اشتعال دلانے کے لئے سرگرم ہیں، شرپسند ہنگامہ آرائی کی ویڈیوز ریکارڈ کر کے بعد میں سوشل میڈیا پر فوج مخالف پروپیگنڈا پھیلانے میں مصروف ہیں۔

شرپسند عناصر 8 فروری سے اب تک مختلف نامی اور بے نامی پروپیگنڈا اکاؤنٹس مسلسل انتشار اور ہیجان برپا کیے ہوئے ہیں، جھوٹ، پروپیگنڈا اور ڈس انفارمیشن پھیلا کر ملک دشمن عناصر کا مقصد پاکستان میں انتشار اور عدم استحکام پیدا کرنا ہے۔

 پاکستان دشمن پروپیگنڈا اور ڈس انفارمیشن کمپین میں ملک سے باہر بیٹھے بھگوڑے یوٹیوبرز سر فہرست ہیں، وہ شر پسند عناصر جو سوشل میڈیا پر گھٹیا اور جھوٹے پروپیگنڈا میں مصروف ہیں ان کی نشان دہی کی جارہی ہے، ایسے عناصر کے خلاف قانون کے مطابق سخت تادیبی کارروائی کے لئے متعلقہ اداروں نے کام شروع کر دیا ہے۔

عوام سے توقع کی جاتی ہے کہ وہ مفاد پرستوں کے ہاتھوں استعمال نہیں ہونگے، توقع ہے کہ غیور پاکستانی آرمی اور سول آرمڈ فورسز کے ساتھ مکمل تعاون جاری رکھیں گے۔