اسلام آباد: آرمی چیف جنرل عاصم منیر کی سعودی ولی عہد شہزادہ محمد بن سلمان سے ملاقات ہوئی ہے۔

پاکستانی فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیرنے سعودی عرب کا سرکاری دورہ کیا، دورے کے دوران آرمی چیف جنرل سید عاصم منیرنے سعودی ولی عہد وزیراعظم شہزادہ محمد بن سلمان بن عبدالعزیز آل سعود سے ملاقات کی۔

آرمی چیف کی سعودی وزیر دفاع شہزادہ خالد بن سلمان بن عبدالعزیز آل سعود، سعودی مسلح افواج کے چیف آف جنرل اسٹاف جنرل فیاض بن حمید الرویلی اور سعودی نائب وزیر دفاع انجینئر طلال عبداللہ ال عتیبی اور دیگر اعلیٰ عسکری حکام سے بھی ملاقاتیں ہوئیں۔

ملاقات کے دوران علاقائی امن و سلامتی، دوطرفہ دفاع اور سیکیورٹی تعاون سمیت باہمی دلچسپی کے وسیع تر امور پر تبادلہ خیال کیا گیا۔

دوران ملاقات سعودی ولی عہد شہزادہ محمد بن سلمان نے گفتگو کرتے ہوئے کہا کہ پاکستان اور سعودی عرب کے تاریخی برادرانہ اور مضبوط تعلقات ہیں، پاکستان اور سعودی عرب ہمیشہ ایک دوسرے کے ساتھ کھڑے رہے ہیں۔

سعودی ولی عہد نے پاکستان کے ساتھ دو طرفہ تعلقات کو مزید مضبوط بنانے کی خواہش کا اظہار کرتے ہوئے کہا کہ سعودی عرب مستقبل میں بھی پاکستان کے ساتھ کھڑا رہے گا۔

بعدازاں آرمی چیف جنرل سید عاصم منیرنے پاکستان کے لیے پرتپاک جذبات اور حمایت پر سعودی قیادت کا شکریہ ادا کیا۔

واضح رہے کہ ملاقات میں سعودی وزیر دفاع شہزادہ خالد بن سلمان بھی شریک تھے جبکہ پاکستان میں سعودی وزیر سعید نواف المالکی اور پاکستانی سفیر احمد فاروق اور ملٹری اتاشی بریگیڈیئر عاصم سمیت دیگر اہم شخصیات بھی شریک تھیں۔