آرمی چیف جنرل سید عاصم منیر نے کہا ہے کہ پاکستان کی مسلح افواج بلوچستان کے امن اور خوشحالی کے لیے کام کرتی رہے گی۔

پاک فوج کے شعبہ تعلقاتِ عامہ (آئی ایس پی آر) کے مطابق چیف آف آرمی اسٹاف جنرل سید عاصم منیر نے بلوچستان کے ضلع آواران کا دورہ کیا، تاہم آواران آمد پر کور کمانڈر بلوچستان کور نے آرمی چیف کا استقبال کیا۔

آرمی چیف کو پاک فوج کی جانب سے آواران کی سماجی و معاشی ترقی بشمول ضلع میں زرعی ترقی کے حوالے سے امکانات پر بریفنگ دی گئی۔

اس موقع پر چیف آف آرمی اسٹاف جنرل عاصم منیر نے آواران کے مقامی عمائدین کسانوں اور شہداء کے خاندانوں سے ملاقات کی اور سماجی ترقی اور سیکیورٹی کے لیے مکمل تعاون کی یقین دہانی کرائی۔

ملاقات میں آرمی چیف نے شہدا کی عظیم قربانیوں کو زبردست خراج عقیدت پیش کیا اور آوران کے عمائدین اور کسانوں سے زراعت کی اہمیت پر زور دیا۔

آرمی چیف عاصم منیر نے گرین پاکستان انیشیٹو کے لیے پاک فوج کے عزم کا اعادہ کیا اور کہا کہ کسانوں کو ہر قسم کی زرعی سہولیات فراہم کی جائیں گی، کسانوں کو زرعی قرضے، بیج ،کھاد، شمسی ٹیوب ویل اور زرعی ماہرین کی جانب سے ماہرانہ مشورے بھی دیے جائیں گے۔

انکا کہنا تھا کہ کسانوں کو سہولیات دینے کا مقصد انہیں کا شتکاری کے لئے فراہم کرنا ہے، کسانوں کو سہولیات دے کر انہیں پاکستان کی ترقی اور خوشحالی کے عمل میں شریک کیا جانا مقصود ہے۔

دوسری جانب چیف آف آرمی اسٹاف جنرل عاصم منیر نے کیڈٹ کالج آواران کا افتتاح کیا اور کالج کے اساتذہ اور طلباء سے ملاقات کی۔

آرمی چیف نے بلوچستان کے عوام کے لئے ایک اور کیڈٹ کالج کے قیام کا خیر مقدم کرتے ہوئے کہا کہ پاک فوج بلوچستان کی ترقی اور آمدادی سرگرمیوں میں بھرپور حصہ لیتی رہے گی، پاک فوج بلوچستان کے متعلقہ سول ڈیپارٹمنٹس کے ساتھ مل کر ترقی اور ریلیف کا کام کرتی رہے گی۔

انہوں نے مزید کہا کہ بلوچستان کی کامیابی پاکستان کی کامیابی ہے، پاکستان کے عوام کو بلوچستان کے بہادر عوام پر فخر ہے، پاکستان کی مسلح افواج اور قانون نافذ کرنے والے ادارے بلوچستان کے امن اور خوشحالی کے لیے کام کرتے رہیں گے۔