راولپنڈی: آرمی چیف جنرل عاصم منیر نے لائن آف کنٹرول کے حاجی پیر سیکٹر کا دورہ کیا۔ تاہم لائن آف کنٹرول آمد پر کور کمانڈر راولپنڈی نے آرمی چیف کا استقبال کیا۔

 پاک فوج کے شعبہ تعلقات عامہ (آئی ایس پی آر) کے مطابق دورے کے دوران آرمی چیف جنرل عاصم منیر نے اگلے مورچوں پر جوانوں کے ساتھ عید الضحیٰ منائی اور عید کی مبارکباد دی۔

آئی ایس پی آر نے بتایا کہ آرمی چیف نے اگلے مورچوں پر افسروں اور جوانوں کے ساتھ عید کی نماز بھی پڑھی۔

ترجمان پاک فوج کے مطابق آرمی چیف نے شہدائے پاکستان کی قربانیوں کو خراج عقیدت پیش کیا اور فوجی دستوں سے خطاب، مادر وطن کی حفاظت کے عزم اور ہائی مورال کو سراہا۔

آئی ایس پی آر کا کہنا ہے کہ آرمی چیف نے مسئلہ کشمیر پر اقوام متحدہ کی قراردادوں کے مطابق پاکستان کے اصولی موقف کا بھی اعادہ کیا اور کہا کہ کشمیریوں کے خلاف بھارت کے جاری ظلم و بربریت کی مذمت کرتے ہیں۔

جنرل عاصم منیر نے کہا کہ انتخابات کے بعد بھارت پاکستان کے خلاف جھوٹے پروپیگنڈے اور اشتعال انگیزیوں سے اپنی جارحیت اور کشمیری عوام کو نشانہ بنانے کی کوشش کر رہا ہے، ایسے ہتھکنڈے بشمول جعلی فلیگ آپریشنز بھارت کا ایک معمول کا سیاسی آلہ بن چکے ہیں۔

آرمی چیف نے مزید کہا کہ پاکستان نے ہمیشہ خطے میں امن و استحکام کی حمایت کی ہے، قوم کی مکمل حمایت کے ساتھ کسی بھی اشتعال انگیزی یا پاکستان کی علاقائی خودمختاری کی خلاف ورزی کا فوری اور پرعزم جواب دیا جائے گا۔