پشاور کے علاقے حسن خیل میں انٹیلی جنس بیسڈ آپریشن کے دوران جام شہادت نوش کرنے والے 2 جوانوں کی نماز جنازہ ادا کر دی گئی۔

پاکستان کی فوج کے شعبہ تعلقات عامہ (آئی ایس پی آر) کے مطابق پشاور کے سب ڈویژن حسن خیل میں انٹیلی جنس بیسڈ آپریشن کے دوران بہادری سے لڑتے ہوئے جام شہادت نوش کرنے والے سپاہی بدام گل شہید (مقامی ڈسٹرکٹ کوہاٹ) اور سپاہی محمد ادریس شہید (رہائشی ڈسٹرکٹ صوابی) کی نماز جنازہ پشاور گیریژن میں ادا کر دی گئی۔

نماز جنازہ میں کور کمانڈر پشاور اور سول و عسکری حکام کی بڑی تعداد نے شرکت کی۔

آئی ایس پی آر نے بتایا کہ شہداء کو پورے فوجی اعزاز کے ساتھ آبائی علاقوں میں سپرد خاک کیا جائے گا۔

واضح رہے کہ گزشتہ روز سیکیورٹی فورسز اور پولیس نے دہشت گردوں کی موجودگی کی اطلاع پر حسن خیل میں کارروائی کی۔ انٹیلیجنس بیسڈ اپریشن کے دوران سیکیورٹی فورسز اور دہشت گردوں میں شدید فائرنگ کا تبادلہ ہوا جس میں 3 دہشت گرد مارے گئے، ہلاک دہشتگردوں سے ہتھیار اور گولیاں برآمد کی گئیں۔

آئی ایس پی آر کا کہنا تھا کہ ہلاک ہونے والے دہشت گردوں میں انتہائی مطلوب دہشت گرد کمانڈر عبدالرحیم بھی شامل تھا، دہشت گرد کمانڈر عبدالرحیم 26 مئی کو کیپٹن حسین جہانگیر اور حوالدار شفیق اللہ شہید کی شہادت کا بھی ذمہ دار تھا، آج کی کارروائی میں 26 مئی کے واقعے میں ملوث ذمہ داروں کو انجام تک پہنچا دیا گیا۔

آئی ایس پی آر کے مطابق دہشت گردوں کے ساتھ جھڑپ میں 4 سیکیورٹی اہلکار بہادری سے لڑتے ہوئے شہید ہوگئے، شہداء میں صوابی کے رہائشی 34 سالہ سپاہی محمد ادریس، کوہاٹ کے رہنے والے سپاہی بادام گل، پشاور کے 38 سالہ سب انسپکٹر تاج میر شاہ اور مانسہرہ کے 34 سالہ سب انسپکٹر محمد اکرم شامل ہیں، شہید ہونے والے پولیس کے سب انسپکٹرز کا تعلق سی ٹی ڈی خیبر پختونخوا سے تھا۔