پاک فوج کے سربراہ جنرل عاصم منیر نے کہا ہے کہ دشمن عناصر عوام اور افواج کے درمیان تعلقات کمزور کرنے کی کوشش کررہے ہیں۔

پاک فوج کے شعبہ تعلقات عامہ (آئی ایس پی آر) کے مطابق چیف آف آرمی اسٹاف جنرل سید عاصم منیر نے یوم آزادی کے موقع پر پاک فوج کے ویٹرنز کے اعزاز میں استقبالیہ دیا، آرمی چیف کے استقبالیے میں ریٹائرڈ فوجی افسروں اور سپاہیوں کی بڑی تعداد نے شرکت کی۔

آئی ایس پی آر نے بتایا کہ آرمی چیف نے پاک فوج سے ریٹائر ہونے والے افسروں اور سپاہیوں کی خدمات کو خراج تحسین کیا اور قومی تاریخ میں اپنے جذبے اور لگن کی بدولت اہم کردار ادا کرنے والے افسروں اور سپاہیوں کے کردار کو سراہا۔

اس موقع پر آرمی چیف نے مشکلات کا مقابلہ کرنے کے لیے اتحاد و یگانگت کی اہمیت پر بھی زور دیا۔

تقریب سے خطاب میں آرمی چیف جنرل عاصم منیر نے پاکستان کے دشمنوں کی جانب سے عوام اور پاک فوج کے درمیان دراڑ ڈالنے کے لیے فیک نیوز اور پروپیگنڈا کے خطرات سے بھی خبردار کیا اور کہا کہ دشمن عناصر عوام اور افواج کے درمیان تعلقات کمزور کرنے کے درپے ہیں۔

پاک فوج کے سربراہ نے مزید کہا کہ ویٹرنز پاکستان کی ترقی میں اہم کردار ادا کرتے رہے ہیں، ویٹرنز سمیت قوم کی غیرم تزلزل حمایت ایسی تمام فضول کوششوں کو ناکام بنائے گی۔

اس دوران پاک فوج کے ویٹرنز نے عسکری قیادت پر مکمل یقین اور اعتماد کا اظہار کرتے ہوئے اندرونی و بیرونی سیکیورٹی خطرات سے نمٹنے کے لیے مکمل تعاون و حمایت کا اظہار کیا۔

آئی ایس پی آر کے مطابق آرمی چیف کی جانب سے استقبالیہ پاک فوج اور اس کے ویٹرنز کے درمیان اٹوٹ رشتے کا اظہار کیا گیا ہے، پاک فوج اور اس کے ویٹرنز قوم کی ترقی خوشحالی اور سلامتی کے لیے متحد ہیں۔