چیئرمین میٹرک بورڈ ڈاکٹر سعید الدین نے کہا ہے کہ میٹرک بورڈ کے امتحانات مقرر کردہ تاریخوں پر ہی لئے جائینگے۔

تفصیلات کے مطابق میٹرک بورڈ کی جانب سے کئے گئے اعلان میں کہا گیا ہے کہ ثانوی تعلیمی بورڈ کے سالانہ امتحانات 16 مارچ سے ہی لئے جائیگے جبکہ ایڈمٹ کارڈ جاری کرنے کا اعلان کر دیا ہے۔

اعلان میں کہا گیا ہے کہ اسکولوں کے سربراہان یا ان کے نمائندے اپنے شناختی کارڈ کی کاپی، آفس کارڈ اور اتھارٹی لیٹر کے ذریعے بورڈ سے ایڈمٹ کارڈحاصل کر سکتے ہیں جبکہ ضلعی بنیاد پر ایڈمٹ کارڈ جاری کئے جائیں گے۔

میٹرک کے امتحانات کی تاریخ آگے بڑھائی جائے‘ پرائیویٹ اسکولز کا مطالبہ

اعلامیے میں کہا گیا ہے کہ مقررہ تاریخ والے دن اس ضلعے کی اسکول مالکان یا ان کے نمائندے بورڈ سے ایڈمٹ کارڈ وصول کر سکتے ہیں جبکہ 5مارچ کو نیو کراچی، نارتھ ناظم آباد، گلبرگ، لیاقت آباد کے اسکولوں کو، 6 مارچ کو جمشید ٹاؤن اور گلشن اقبال کے اسکولوں کو، 7مارچ کوشاہ فیصل کالونی، ملیر، بن قاسم اور لانڈھی کے اسکولوں کو اور 9 مارچ کو کورنگی، صدر، لیاری،کیماڑی، اورنگی، سائٹ، بلدیہ اور گڈاپ کے اسکولوں کو ایڈمٹ کارڈ جاری کئے جائیں گے۔

یاد رہے کہ سیکریٹری بورڈ اینڈ یونیورسٹیز نے آج تمام بورڈ کو طلبا کو فوری طور پر ایڈمٹ کارڈ اور شیڈول کی فراہمی کو یقینی بنانے کی ہدایت دی تھی جبکہ اسکولوں کی نمائندہ تنظیموں نے میٹرک بورڈ کے امتحانات 25 مارچ سے کرانے کا مطالبہ کر رکھا ہے۔

چیئرمین آل سندھ پرائویٹ اسکولز اینڈ کالجز ایسوسی ایشن حیدر علی نے کہا ہے کہ سندھ بھر میں میٹرک کے امتحانات 25 مارچ سے شروع کیے جائیں۔

انہوں نے مطالبہ کرتے ہوئے کہا ہے کہ کورونا وائرس کے باعث سندھ حکومت کی جانب سے صوبے بھر میں تمام تعلیمی ادارے 13 مارچ تک بند کردیئے گئے ہیں اسکولز بند ہونے کی وجہ سے 16 مارچ سے آغاز ممکن نہیں ہے۔

ان کا کہنا تھا کہ 15 مارچ  تک اسکول مکمل طور پر بند ہونے کی وجہ سے ایڈمٹ کارڈ کی وصولی اور اجراء نہیں ہوسکتا ہے اور 16 مارچ تک امتحانی مراکز والے اسکولز بھی امتحانی تیاری نہیں کرسکتے ہیں