وفاقی وزیرتعلیم شفقت محمود نے کہا ہے کہ ملک بھرمیں کسی بورڈ کا امتحان نہیں ہوگا، ریپیٹ کرنے والے اور پرائیوٹ طلبا کے حوالے سے جمعہ تک فیصلہ کیا جائے گا۔

تفصیلات کے مطابق وفاقی وزیر تعلیم شفقت محمود کی زیر صدارت وزارت تعلیم میں اہم اجلاس ہوا ، جس میں طلبا کو بغیر امتحانات پروموٹ کر نے سے متعلق غور کیا گیا ، تمام بورڈز کے چیئرمینوں بذریعہ ویڈیو لنک اجلاس میں شرکت کی۔

اجلاس میں وزارت تعلیم نے بغیر امتحانات پروموٹ کرنے سے متعلق تعلیمی بورڈز سے سفارشات طلب کرلیں جس پر تعلیمی بورڈز نے سفارشات دینے کیلئے وقت مانگ لیا ، جمعہ تک تمام سفارشات کو مکمل کرکے لائحہ عمل کا اعلان کیا جائے

وفاقی وزیرتعلیم شفقت محمود نے کہا کہ جمعہ تک تمام امور پر جامع اعلان کردیا جائے گا۔

دوسری جانب وفاقی وزیرتعلیم شفقت محمود نے سماجی رابطے کی ویب سائٹ ٹوئٹر پر اپنے بیان میں کہا کورونا لاک ڈاؤن کی وجہ سے ملک بھرمیں کسی بورڈ کا امتحان نہیں ہوگا، امتحانات نہ لیے جانے پر کوئی کنفیوژن نہیں۔

All Board exams are cancelled. No confusion on that. 80% students have no issues. There are some categories like repeaters or improvers and private students and some others whose issues need to be addressed and will be by Friday https://t.co/Mnwy1Nrgx7

— Shafqat Mahmood (@Shafqat_Mahmood) May 11, 2020

اپنے پیغام میں شفقت محدود نے کہا کہ وزارت تعلیم ملک بھر کے 29 بورڈ کے ساتھ رابطے میں ہیں جنہوں نے تجاویز تیار کرنے کےلیے چند دنوں کی مہلت مانگی ہے۔

وفاقی وزیرتعلیم شفقت محمود نے مزید کہا کہ امتحانات نہیں ہوں گے ، طلبا پروموٹ ہوجائیں گے ، ریپیٹ کرنےوالے اور پرائیوٹ طلبا کے حوالےسے جمعہ تک فیصلہ کیا جائے گا۔

امتحانات نہ لینے کا حکومتی فیصلہ مسترد

واضح رہے اس سے قبل وفاقی حکومت کی جانب سے ملک بھر کے تعلیمی بورڈز کے زیر اہتما م ہونے والے تمام امتحانا ت منسوخ کر دیے گئے تھے۔

وفاقی وزیر برائے تعلیم شفقت محمود نے پریس کانفرنس میں بتایا تھا کہ وفاقی حکومت نے فیصلہ کیا ہے کہ تعلیمی بورڈز کے زیر اہتما م ہونے والے تمام امتحانا ت منسوخ کر دیے گئے  ہیں اور تمام جماعتوں کو پچھلے امتحانات کی بنیاد پر ہی پروموٹ کیا جائے گا۔

انہوں نے یہ بتایا تھا کہ اس فیصلے کی منظوری قومی رابطہ  کمیٹی میں دی گئی ہے۔

شفقت محمود نے مزید بتایا تھا کہ نویں، دسویں، گیارہویں، بارہویں جماعت کے طلبا کو سابقہ نتائج پر اگلی کلاسز میں ترقی دی جائیگی جبکہ یونیورسٹیز میں داخلے گیارہویں جماعت کے نتائج پر ملیں گے۔