صوبائی وزیرِ تعلیم رانا سکندر حیات کا کہنا ہے کہ اسکول نیوٹریشن پروگرام کا پہلا مرحلہ رواں ہفتے شروع ہوگا۔

  صوبائی وزیرِ تعلیم رانا سکندر حیات کا کہنا ہے کہ بچوں کی غذائی ضرورت مدنظر رکھتے ہوئے نیوٹریشن پروگرام کا آغاز جنوبی پنجاب سے کیا جا رہا ہے، نیوٹریشن پروگرام کی خود مانیٹرنگ کروں گا۔

انہوں نے کہا کہ آج جنوبی پنجاب جا رہا، نیوٹریشن پروگرام کے آغاز تک وہاں موجود رہوں گا، میل پروگرام کا آغاز راجن پور، مظفر گڑھ اور ڈی جی خان سے کیا جا رہا ہے۔

 رانا سکندر حیات کا کہنا ہے کہ نیوٹریشن پروگرام میں حکومت کے سوا ارب روپے بچائے ہیں، مارکیٹ میں 85 روپے میں ملنے والا دودھ کا پیک تقریباً 64 روپے میں لے رہے ہیں۔

صوبائی وزیرِ تعلیم نے کہا کہ روزانہ کئی لاکھ بچے بغیر ناشتے کے اسکول آتے ہیں، جنوبی پنجاب میں بالخصوص خوراک کا مسئلہ درپیش ہے، بچے وٹامن کی کمی کا شکار ہیں۔

انہوں نے کہا کہ بچوں کی بہتر نشونما اور تعلیم پر رجحان کیلئے نیوٹریشن پروگرام کا آغاز ضروری تھا، نیوٹریشن پروگرام کا افتتاح وزیر اعلیٰ مریم نواز 5 ستمبر کو کریں گی۔

 رانا سکندر حیات کا کہنا ہے کہ نیوٹریشن پروگرام میں ہر تین ماہ بعد بتدریج اضلاع کا اضافہ کیا جائے گا۔