گلو کارشہزاد رائے کا کہنا ہے کہ سرکاری اسکولوں میں بچوں کو جنسی استحصال کے بارے میں آگاہی دے رہے ہیں لیکن اس کے ساتھ ساتھ نصاب میں بھی جنسی استحصال کو شامل کرنا چاہیے۔

تفصیلات کے مطابق پاکستان کے معروف گلوکار اور سماجی کارکن شہزاد رائے نے چائلڈ پروٹیکشن بیورو کا دورہ کیا اور چائلڈ پروٹیکشن بیورو کی چیئرپرسن سارہ احمد سے ملاقات بھی کی۔

اس مو قع پر شہزاد رائے کا کہنا تھا کہ محکمہ تعلیم جنسی ہراسگی سے آگاہی کو نصاب کا حصہ بنائے، بچوں پر جنسی تشدد سے متعلق آگاہی کی ضرورت ہے۔

انھوں نے کہا کہ پنجاب میں جو کام ہو رہا ہے بہت اچھا ہے، بچوں کی تربیت کرنا ہے تاکہ بچے اپنی فیملی کو آگاہ کر سکیں، ریسرچ کے مطابق ہر پانچواں بچہ جنسی استحصال کا شکار ہوا ہے۔

شہزاد رائے نے کہا کہ اب لوگ اس پر بات کرنے سے ہچکچاتے نہیں، جلد ہی باقی صوبے میں بھی آگاہی پہنچا دیں گے، پنجاب میں جب بھی جنسی کیس رپورٹ ہوا اس نے ہلچل مچائی۔

انہوں نے یہ بھی کہا کہ جنسی ہراسگی سے متعلق کبھی بات نہیں ہوتی، ہم سب اس موضوع پر گفتگو کرنے سےہچکچاتے ہیں، فنڈز کی کمی ہوگی مگر ہم مل کر کام کریں گے تو بہت سے مسائل حل ہوں گے۔

اس مو قع پر چائلڈ پروٹیکشن کی چیئرپرسن سارہ احمد نے کہا کہ وہ شہزاد رائے کے زندگی ٹرسٹ کیساتھ مل کرکام کرینگے ، بیورو کی جانب سے بچوں کو جنسی طور پر ہراساں کرنے کے خلاف آوازبلند کرنے کیلئے ہیلپ لائن 1121 پر شکایت درج کرانے سے متعلق بھی آگاہ کیا گیا۔