دفتر خارجہ میں بنائی گئی ویڈیو کا تنازعہ ،ٹک ٹاک اسٹار حریم  شاہ اور اداکارہ وینا ملک سوشل میڈیا پر آمنے سامنے آگئے۔

تفصیلات کے مطابق سوشل میڈیا پر اپنی ویڈیوز سے شہرت پانے والی حریم شاہ کے دفتر خارجہ کے اہم میٹنگ روم میں ٹک ٹاک ویڈیو نے تہلکہ مچا دیا۔

 حریم شاہ نے اپنے سوشل میڈیا اکاؤنٹ پر ایک ویڈیو شیئر کی  جس میں وہ دفتر خارجہ کی عمارت کے میٹنگ روم میں بغیر کسی حیل حجت  آزادانہ گھومتی پھرتی نظر آرہی تھیں جبکہ دفتر خارجہ میں لی گئی اپنی ایک تصویر بھی شیئر کی جس میں وہ صدارتی نشست پر براجمان ہیں، ساتھ ہی کیپشن میں ’وزیر اعظم حریم شاہ‘ بھی لکھ دیا۔

حریم شاہ کی دفتر خارجہ میں بنائی گئی ٹک ٹاک ویڈیو وائرل ہونے کے بعد تنازع کھڑا ہوگیا جس کے بعد سوشل میڈیا پر نئی بحث چھڑ گئی اور صارفین کی جانب سے انہیں شدید تنقید کا نشانہ بنایا جارہا ہے۔

پاکستان کی نامور اداکارہ وینا ملک بھی ٹک ٹاک ویڈیو تنازع پر پیچھے نہیں رہیں اور سماجی رابطے کی ویب سائٹ ٹویٹر پر انہیں تنقید کا نشانہ بناتے ہوئے کہا کہ ’’بات تمغہ امتیاز سے شروع ہوئی تھی، اب وزیراعظم کی کرسی تک پہنچ گئی ہے، اس تمام معاملے کی تحقیق ہونی چاہئے کہ کس کے اندر کا ہیرو سر عام ذلیل ہونے کے لیے بے قرار ہے‘‘۔

بات تمغہ امتیاز سے شروع ھوئ تھی اور اب وزیراعظم کی کرسی تک پہنچ گئ ھے۔۔۔اس تمام معاملے کی تحقیق ھونی چاھئے۔۔۔کس کے اندر کا ھیرو سر عام زلیل ھونےکے لیے بیقرار ھے!!!

— VEENA MALIK (@iVeenaKhan) October 23, 2019

وینا ملک کی ٹویٹ پر حریم شاہ بھی میدان میں آگئیں اور دونوں کے درمیان لفظی گولہ باری شروع ہوگئی جس پر حریم شاہ نے وینا ملک کو ان کا ماضی یاد دلاتے ہوئے لکھا کہ ’’فوٹو یاد ہیں یا گوگل سے ڈاؤن لوڈ کر کے طبق روشن کردوں‘‘۔