پاکستان شو بز انڈسٹری کے نامور ڈراما رائٹر خلیل الرحمان قمرجو ٹی وی سیریل ’’میرے پاس تم ہو‘‘ سمیت متعدد ہٹ ڈراموں اور فلموں کے مصنف ہیں، نے وزیراعظم عمران خان کو پٹرول کی قیمتوں میں ہوشربا اضافہ کرنے پر آڑے ہاتھوں لیتے ہوئے کئی ٹوئٹس کیں۔

تفصیلات کے مطابق سماجی رابطے کی ویب سائٹ ٹوئٹر پر خلیل الرحمان قمر نے لکھا کہ سیاستدانوں میں وہ مائی کا لال پیدا ہی نہیں ہوتا جو حکومت بچانے کے بجائے غریب کے ساتھ کھڑا ہوجائے، تم نے ثابت کیا ہے عمران خان تم ایک بزدل حکمران اور ہم ایک بدقسمت قوم ہیں۔

سیاستدانوں میں وہ مائی کا لال پیدا ہی نہیں ہوتا جو حکومت بچانے کی بجائے غریب کیساتھ کھڑا ہو جائے
تم نے ثابت کیا ہے عمران خان تم ایک بزدل حکمران اور ہم ایک بدقسمت قوم ہیں

— Khalil Ur Rehman Qamar (@KrqOfficial) June 26, 2020

خلیل الرحمان قمر کے اس اس ٹوئٹ پر سوشل میڈیا پر تحریک انصاف کے سپورٹرز کی طرف سے سخت ردعمل دیکھنے کو ملا۔

شدید مخالفت دیکھنے کے بعد خلیل الرحمان قمر نے سخت الفاظ استعمال کرنے کی وضاحت کرتے ہوئے کہا کہ میری اپنے تما م مداحوں سے درخواست ہے کہ کوئی ناسمجھ اگر مجھے برا بھلا بھی کہے تو ماں بہن کی گالیاں مت دیجئے۔

میری اپنے فینز سے درخواست ہے کہ کوئی ناسمجھ اگر مجھے برا بھلا بھی کہے تو ماں بہن کی گالی مت دیجیے
عمران خان میری بھی امید ہے
میں ڈر رہا ہوں کہ امید ٹوٹ رہی ہے

— Khalil Ur Rehman Qamar (@KrqOfficial) June 27, 2020

واضح رہے کہ پٹرولیم مصنوعات کی قیمتوں میں فی لیٹر 25 روپے اضافے پر جہاں پاکستانی وزیراعظم عمران خان پر سیخ پا ہیں، وہیں شوبز ستارے بھی وزیراعظم  کو خوب آڑے ہاتھوں لے کر اپنی اپنی رائے کااظہار کر رہے ہیں۔