پاکستانی اداکار آغا علی نے سوشل میڈیا پر شوبز اسٹارز کی ایڈیٹڈ تصاویر پر تبصرہ کرتے ہوئے کہا کہ جن کے کام کو پہچان نہیں ملتی وہ لوگ پی ڈی اے سے بھرپور تصاویر سوشل میڈیا پر شیئر کرتے ہیں۔

اداکار نے اپنے ایک انٹرویو میں سوشل میڈیا پر فنکار جوڑیوں کی تصاویر پر کھل کر تبصرہ کیا۔

ان کا کہنا تھا کہ نجی زندگی کو نجی اور پیشہ ورانہ زندگی کو پیشہ ورانہ کسی وجہ سے ہی کہا جاتا ہے۔

آغا علی نے کہا کہ میں اپنی بیوی کے ساتھ گھر کے کسی بھی کونے میں کوئی تصویر لے کر سوشل میڈیا پر شیئر کرنا پسند نہیں کرتا کیونکہ میں سمجھتا ہوں کہ گھر کے اندر کی زندگی میری اپنی ہے اور یہ میری حد تک ہی رہنی چاہئیے۔

ساتھ میں انہوں نے سوشل میڈیا پر شیئر کی گئی اپنی تصاویر کا دفاع یوں کیا کہ اب ایسا بھی نہیں ہے کہ ہم کوئی تصویر سوشل میڈیا پر لگاتے ہی نہیں، ہم عید پر ایک ساتھ تصویر بنا کر لگاتے ہیں، اور یہ اس لئے ہے کہ ہم عوامی شخصیات ہیں۔

آغا علی کا کہنا تھا کہ جو شوبز شخصیات اپنی تصاویر لے کر ہر وقت سوشل میڈیا پر جاری کرتی رہتی ہیں شاید ان کو خوشی ملتی ہو گی۔

اداکار نے مزید کہا کہ اصل میں جب ان کو اپنے کام سے لوگوں کی توجہ نہیں ملتی تو وہ توجہ حاصل کرنے کے لئے کچھ نہ کچھ کرتے رہتے ہیں۔