سوشل میڈیا پر اس وقت کوئی بھی صارف ایسا نہیں ہے جس نے جنید صفدر کے نکاح کی تقریب میں حیرت انگیز طور پر شاندار گانا گاتے انہیں نہ دیکھا ہو اور  پسند نہ کیا ہو۔

پاکستان کی مشہور شخصیات بھی نوجوان دولہے کی گلوکاری کی مہارت کو دیکھ کر حیران رہ گئے۔

جنید صفدر نے اپنے نکاح کی تقریب میں محمد رفیع کے گانے  کیا ہوا تیرا وعدہ کا ایک مختصر حصہ کمال خوبصورتی اور مہارت سے گایا جس سے حاضرین نے خوب لطف اٹھایا۔

اداکارہ صبور علی،  اریبہ حبیب، عفت عمر، انوشے اشرف، زویا ناصر، عبیر رضوی و دیگر نے ویڈیو پر کمنٹس کر کے اپنی پسندیدگی کا اظہار کیا۔

میزبان متھیرا نے لکھا کہ جنید صفدر تو حقیقی طور پر ایک باصلاحیت شخصیت ہیں۔

اداکارہ اریبہ حبیب نے جنید صفدر کی ویڈیو کو اپنی انسٹاگرام اسٹوری پر شیئر کرتے ہوئے لکھا کہ یہ انٹرنیٹ پر آج وائرل ہونے والی خوبصورت ترین چیز ہے، بوائے نے دل جیت لیا۔

تمغۂ امتیاز حاصل کرنے والی اداکارہ مہوش حیات بھی جنید صفدر کی ویڈیو کو لائک کرنے والوں میں شامل ہیں۔

واضح رہے کہ جنید صفدر کی گلوکاری کے سوشل میڈیا پر خوب چرچے ہیں، نکاح کی تقریب میں اگرچہ گلوکار نوین کندرا کی خدمات بھی حاصل کی گئی تھیں جنہوں نے اپنے گانوں سے سامعین کو مسحور کیا لیکن وہیں جنید نے بھی اپنی سُریلی آواز میں مقبول گانا بھی گایا تھا۔

یاد رہے کہ اتوار کو لندن کے مقامی ہوٹل میں جنید صفدر کے نکاح کی تقریب ہوئی جس میں سابق وزیراعظم نواز شریف اور سابق وزیر خزانہ اسحاق ڈار سمیت خاندان کے قریبی افراد شریک ہوئے تھے۔