اداکارہ نمرہ خان کے سابق شوہر اعظم کی جانب سے نمرہ کے لئے تحقیر آمیز الفاظ استعمال کرنے پر نوشین شاہ چُپ نہ رہ سکیں۔

اداکارہ نے راجا افتخار اعظم کی جانب سے نمرہ کے لئے کہے گئے الفاظ کی مذمت کرتے ہوئے کہا کہ  میں معذرت خواہ ہوں لیکن نمرہ کے سابق شوہر کی ویڈیو نے مجھے بولنے پر مجبور کردیا ہے، اب میں خاموش نہیں رہ سکتی۔

نوشین شاہ نے لکھا کہ نمرہ کے گھر میں نے اس شخص سے اور اس کی والدہ سے ملاقات بھی کی تھی۔

انہوں نے بتایا کہ راجا اعظم شراب کا عادی تھا، گالم گلوچ اور بدتمیزی بھی کرتا تھا۔

اداکارہ نے لکھا کہ مجھے اچھی طرح معلوم ہے نمرہ نے اس جاہل آدمی کے لئے کیا کچھ نہیں کیا اور کیا کچھ نہیں سہا، اس نے اپنی شادی بچانے کی پوری کوشش کی۔

نوشین شاہ نے لکھا کہ مجھے بےحد خوشی ہے کہ وہ اپنے لئے کھڑی ہوئی، فیصلہ لیا اور اس پر قائم بھی رہی کیونکہ نمرہ کی شادی ایک زہر کی مانند تھی۔

یاد رہے کہ گزشتہ روز سوشل میڈیا پر نمرہ خان کے سابقہ شوہر کی ایک ویڈیو زیرگردش تھی جس میں ان کا کہنا تھا کہ نمرہ اور وہ طلاق یافتہ ہیں، انہوں نے نمرہ سے چھٹکارا حاصل کیا کیونکہ وہ محض ایک سر درد تھی۔

واضح رہے کہ گزشتہ برس 21 اپریل کو نمرہ خان نے راجا افتخار اعظم سے خاموشی سے نکاح کرلیا تھا۔

حال ہی میں نمرہ خان نے طلاق سے متعلق ایک شو میں بات کرنے سے انکار کردیا تھا، لیکن بس یہ کہا تھا کہ والدین ان کے لئے اچھے رشتے کی تلاش میں ہیں۔