صرف ایک ڈرامے میں اداکاری کرنے کے بعد پاکستانی ڈرامہ انڈسٹری کو خیر آباد کہنے والی اداکارہ ایمن سلیم نے معروف اداکار و میزبان احسن خان کی میزبانی کی تعریف کرتے ہوئے کہا ہے کہ وہ ایک مزاحیہ میزبان ہیں۔

اداکارہ نے اپنی انسٹا اسٹوری پر ایک ویڈیو کلپ شیئر کی ہے جس میں وہ اداکار ارسلان نصیر کے ساتھ مل کر احسن خان کے شو میں اُن ہی کا  تعارف کرواتے نظر آرہی ہیں۔

انہوں نے اپنی اسٹوری کے کیپشن میں لکھا کہ  ہم احسن خان کو ان کے ہی شو میں دعوت دینے جارہے ہیں جو کہ ایک مزاحیہ میزبان اور بہت ہی عاجز انسان ہیں۔

واضح رہے کہ ایمن سلیم اور ان کے ساتھی اداکار ارسلان نصیر کو رمضان میں نجی ٹی وی چینل پر نشر ہونے والے خصوصی ڈرامے چُپکے چُپکے سے کافی شہرت حاصل ہوئی تھی اور ان دونوں کو ایک ساتھ خوب پسند بھی کیا گیا تھا۔

دونوں فنکاروں نے صرف ایک ہی ڈرامے میں اداکاری سے اپنی دلچسپ ڈائیلاگ ڈیلیوری اور جاندار اداکاری کے بل بوتے پر شائقین کی توجہ اپنی جانب مبذول کروالی تھی۔

تاہم اداکارہ ایمن سلیم نے صرف ایک ڈرامے میں کام کرنے کے بعد ہی اداکاری چھوڑنے کا اعلان کر دیا تھا۔

سوشل میڈیا پر اپنے مداحوں کو آگاہ کرتے ہوئے ان کا کہنا تھا کہ اب وہ اداکاری نہیں کریں گی لیکن ساتھ ہی ان کا کہنا تھا کہ وہ انڈسٹری سے بے حد محبت کرتی ہیں اور ہمیشہ اس سے جڑی رہیں گی۔

اداکارہ نے مستقبل کے حوالے سے بہت جلد آگاہ کرنے کی یقین دہانی بھی کرائی تھی۔